郊遊樂無窮

各位，4天的復活節假期過得如何呀？
狂玩？狂食？狂瞓？還是樣樣都做勻？
本來今個假期計劃去個短程旅行的，
但後來因種種原因而沒有成行！
我決定留港消費，但大部份友人都鳥獸散去世界各地，
美國、日本、菲律賓、大陸及泰國 (友人已安全抵步)..
剩下小貓三幾隻在港有乜搞呢？
友人竟提議到大埔踩單車加燒烤，
哇.. 即是挑戰我的極限啦！！
橫豎放假，我又姑且奉陪...

我們先相約在大埔墟新街市的熟食中心吃午餐；這家《東記上海麵》在新界區享負盛名，多年前在大埔一些溪澗旁搭檔經營。後來遷往大埔墟街市，年前當新街市落成後便進駐到現址
當日未到1時周圍已坐得滿滿的
這裡主打上海麵，另亦有米線及河粉；相中的是招牌麵 - 鮮荀絲肉絲麵；荀絲極之鮮甜爽脆
榨菜肉絲麵
炸雞翼 - 外脆內滑，又不會一口油，一客有4大隻
炸豬扒 - 大塊到呢.. 又是出色之作，炸得極之鬆化，而且肉汁仍在；這家《東記》非常價廉物美，單一碗鮮荀絲肉絲麵賣$16，加拼炸雞翼或炸豬扒都只是$22
熟食中心內還有另一家很有名的《有記茶果》，砵仔糕就最受歡迎！我們一人一個，好開心，不過這位前線“員工”副尊容就... 老闆不妨考慮將小檔改名為《貞子茶果》囉出發去踩單車啦！從大埔墟去大尾篤可乘20C專線小巴.. 咦，咪住.. 大尾篤變了大美督嘅？？
去到大尾篤首先當然去租架單車先.. 平均$40就可以租用3個小時.. 這家《龍記》有好多車租喎，連買餸車都有？？
可能當天是長週末假期，遊人多到發癲(連我都去)，基本上每踩廿秒便要停下避車，尤其是那些阻頭阻勢的2人情侶單車及4人冚家大細單車，它們幾乎把所有路封死，激到彈起呀
最後我們踩出了近大馬路那邊的單車徑，情況好多了.. 一邊踩可以一邊看夕陽，多好！
咦，大尾篤的巴士站流行擺放designer chair？？
交還單車後我們再步行到燒烤場地.. 齋望門面已經覺得好retro
顧客需先到這個counter附錢然後到另一counter自取食物
我們點了6人套餐，每人$80就有雞/牛扒、雞翼、沙嗲魷魚、紅腸、雞肉/芝士腸、牛/墨魚丸、魚蛋、方包及棉花糖各一包.. 味道也不錯啊
烤方包加蜜糖真的好好味
燒烤場其實ok簡陋，不過勝在夠大熱鬧
從這個角度望過去，有點台灣味
嘩嘩嘩.. 連廣末涼子都來BBQ呀！！
燒了3句鐘，夠晒皮啦~ 臨離開前拍了這張人影照，聽講時下的年青人好鍾意咁影架.. 話時話，這趟郊遊樂玩足一日都是用了兩舊多，合晒經濟原則