速報！香港小姐12 - 迷你港姐gathering

知道啦、知道啦，
Blogger's Choice就快公佈架啦，
勞煩各位巴打絲打耐心等多陣！

雖然未公佈得Blogger's住，
但我都有港姐消息要報導下架！

今晚敝公關公司為置地廣場搞了一個時裝秀，
邀請的眾多嘉賓中包括了3位港姐，
分別是應屆冠軍張名雅、09年亞軍李姿敏及93年冠軍莫可欣！

也算是個迷你港姐gathering啊！

你好呀Carat，以後多多合作呀！
今晚所見張名雅很受傳媒歡迎喎，喪做訪問！呢個down server事件反而令沉寂已久港姐選舉再度受人關注，算是另類得著吧
多謝莫可欣今晚也來撐場，感激感激
3個來自不同年份的港姐3甲人馬：左起 - 2012年冠軍張名雅/1993年冠軍莫可欣/2009年亞軍李姿敏

速報！香港小姐12之慧妍愛心傾城30年

唔知大家有無睇到《慧妍愛心傾城30年》呢？
其實個節目係響上星期四預先錄影既！

既然呢個係為慶祝慧妍30週年而特別炮製既節目，
當然唔少得我啦，再次感激阿Anne既幫忙！

完左節目，當我同某些嘉賓正在寒暄之制，
見到4位應屆港姐行過，我第一時做做攝石人影張相先！

近距離所見，我都係覺得張名雅比較sharp，
即係4個一拍埋，佢絕對係最outstanding嗰個，
至於大眾飛佛朱千雪啦喎，勝在笑容可掬.. 咁囉！

係喎，係喎，究竟邊個會去國際小姐呢呵？

速報！香港小姐12 (結果公佈)

一！地！眼！鏡！碎！

第40屆香港小姐競選在一噓聲中落幕，
結果由賽前半熱人馬，現年24歲，
身高5呎4吋的張明雅榮登寶座，
她同時兼得國際親善小姐！
張明雅曾奪09年溫哥華華裔小姐亞軍名銜，
可以說是相當有選美命。

亞軍是賽前大冷馬，現年23歲的黃心穎，
季軍是大熱之一，芳齡24歲的朱千雪，
而由15位前港姐選出的最上鏡小姐則是另一熱門岑杏賢。

在籌備初期揚言今年會大搞港姐的余詠珊，
結果真是一語成籤，成個招牌俾佢搞衰晒，
事前大肆吹噓的全民一人一票投選冠軍，
在臨門一腳竟然down server，
最後都係要用返大會評判分數去決定三甲位置，
吹！漲！

呢幾日相信大家睇飽睇夠有關投唔到票的相關新聞，
在此都不想多談，反正結果都要不可能推翻的！
不過有一句說話我都想講的：無能力就咪搞科技啦好心！！

講返整個決賽過程，在製作上雖然無記落足重本，
又call齊天皇巨星、前港姐及全台花旦小生，
但電視城始終是電視城，任憑你將一、二、三廠打通，
但感覺都是比不上紅館的。
另外那個集亞姐及各大澳門酒店裝修於一身的舞台，
點睇都是好便宜嗰隻！

至於服裝啦喎，well.. 有Karen Chan一日都是不會有靚衫的，
你看看那套泳裝，又是一堆二堆的羽毛插晒上身，真是用極唔厭！
(不過今年的晚裝倒是非常正常)

節目編排方面真是悶親街坊，問答環節勁多，
講嘢多過catwalk同擺甫，可能就係咁益晒那些口才較好的佳麗！

那佳麗們的表現又如何呢？就等我逐個品評一下，
另外亦有一些獨家照片分享！

陳潔玲 - 一路我都麻麻佢，但當晚一出場又令我眼前一亮喎。化妝及髮型都好有型格，令她由一個死靚妹搖身一變成為時尚model。這個大變身以為可讓她殺入6強，但最後都是無功而回，可能說話時無喱表情是她失分的主因
張名雅 - 當晚小弟有幸在現場觀戰，當我在中場休息上洗手間時在走廊遇上6強佳麗，真人所見張名雅確實幾sharp，再加上成熟淡定的表現，力壓群芳並非僥倖。講真，如果server無down的話我都會投佢一票架！
張鈞美 - 每年總有一個半個佳麗被髮型累死，今年的犧者是張鈞美。唉，我的favourite就此被玩謝，入到6強都應該要還神。
朱千雪 - 唔明喎，乜解究全港市民都認為朱千雪應該成為冠軍呢？實情朱小姐一大笑時個口在高清鏡頭下真是大到嚇親喎，牙肉又露晒咁，就算談吐幾好，身材幾平均，我覺得入6強已經好盡囉。
林泳淘 - 幾上鏡，但陣“藝員味”始終太濃，再加上今年評判似係100%專注內涵，林泳淘點會有運行先？！
李渼琦 - 五官真是相當標緻，我會選佢做最上鏡小姐呀！不過談吐方面實在要打大交叉，廣東話唔好是一件事，成日遊魂咁樣才是致命傷
岑杏賢 - Overall package是幾有冠軍相，最後三甲不入但反而執到個最上鏡小姐，真搞笑！在訪問最上鏡小姐評判時，一班前港姐個個都話買重佢，我心諗：而家是選最上鏡小姐，不是選冠軍呀，個最上鏡小姐要省鏡架喎。
湯洛雯 - 論整體表現(樣貌、談討、身材等等)，我覺得佢是絕對要入三甲的，最後在對手不算太強的情況下6強止步，好陰功囉！衰乜呢？莫非見評判是表現好差？抓狂呀！
曾明俐 - 身材殺晒，但一近鏡就謝晒！當晚所見樣貌的確不甚pleasant，落選是意料中事！
黃心穎 - 宣佈她進入三強的時候，現場觀眾齊齊嘩了一聲！橫睇掂睇，點都睇唔出有甚或長處。有些網民說她談吐不錯喎，但好極都未好到要俾個亞軍佢掛！！黃心穎應該是今年出戰國際小姐的人選，大家有無眼睇呢？！
1廠門外的佈置
無記在1廠門外鋪了紅地氈，率先有15位前港姐等場！左起：03年冠軍曹敏莉/73年殿軍趙雅芝/85年季軍王愛倫
左起：98年冠軍向海嵐/97年5強歐陽妙芝/86年冠軍李美珊
個台係真係好似澳門唔知邊間酒店呢
大會在正式開場前在於二廠設置酒會，一眾高層、評判、前港姐及全部小生花旦均有出席
本年度的5位大會評判
去年的4位得獎佳麗，左起：亞軍朱希敏/冠軍朱晨麗/季軍許亦妮/國際親善小姐梁麗翹
2012年國際親善小姐張明雅。明年的世界小姐將會於9月舉行，唔知Carat有無得去選呢？
去年的最上鏡小姐得主許亦妮頒獎予今年的得獎者岑杏賢！高下立見到呢。。
如果server無出事，相信今年的三甲次序必定要改寫了
張名雅在一片爭議聲中當選，壓力可真不少，希望她能撐得住呢！
得獎佳麗在賽後與15位前港姐合照
左起：86年冠軍李美珊/99年亞軍原子鏸/97年5強歐陽妙芝/96年亞軍李嘉慧/03年冠軍曹敏莉/98年向海嵐/85年季軍王愛倫/本年港姐三甲及最上鏡小姐/73年殿軍趙雅芝/93年5強陳妙英/89年冠軍陳法蓉/97年冠軍翁嘉穗/75年季軍關淑芬/95年冠軍楊婉儀
久違了的港姐冠軍李美珊。哎呀，唔記得問佢係咪真是懂得13國語言添
雖然與朱晨麗只有一面之緣，但當晚她一眼就認定出在下，厲害！咁聰明，在娛樂圈應該會有好發展吧
自從去年在國際小姐中認識後，每隔一段時間就會碰上許亦妮，感覺很特別，希望在卸任後她會在娛樂圈有光明的前途
被兩位港姐冠軍夾擊，嘻嘻
兩位90年代的港姐冠軍，向海嵐及楊婉儀
嘩，華仔呀！！！
中間白衣者就是港姐之母陳紫蓮，雖然退了休但港姐40週年喎，梗要回娘家支持啦