2.29.2008

林狗唔求其大合唱


05.. 06.. 08..
4年內3度是但噏,開得如此頻密fans依然瘋狂撲飛,
可見阿Jan笑功依然獨步武林,長做長有!
今勻雖然更踩入紅館搞大佢,但因公開發售的飛數極少,
所以在下未能為各界友好落order,真抱歉!
其實跟阿Jan是有點淵源,他是我的學兄,比我大3屆,
上中學時候的他並不活躍,但作為林姍姍的弟弟也總有點風頭。
後來我也進了CR,雖然未曾真正共事但也算同事呢!

星期四晚去了看尾場《是但噏求其大合唱》,
話明大合唱,除了搞gag當然有歌唱部份,
全程3粒鐘棟篤笑住唱,少點體能也不可應付得來。
眾所周知,阿Jan是潮人,好updated,
所以好多gag位都是依著城中熱話出發,
例如:淫照事件、ipod等等都很爆笑,
不過我個人覺得最得手的是他扮何博士唱歌、
扮discovery channel中經常看到的大鵬展翅、

扮軒仔青筋暴現兼假聲唱《酷愛》、
及扮郭天王在迷你版360度活動舞台跳舞。
可能今次是上紅館舞台關係,就像一個指標,
阿Jan也不容有失,除面部表情更豐富外,
更加多了很多肢體動作,實行要笑死你,
而從當晚的反應來看,觀眾絕對是愛死阿Jan的!


左:台後一片粉紅海及;右:一片花海~ 格仔衫那一位是“唔嫌早”~
左:粉紅林狗頭好cute;右:舞林大會搬到了紅館?
話晒尾場,點都要喊(扮)啦~

嘩今次連煙花都放埋,果然唔求其~

2.28.2008

CR回憶錄之爬格仔的日子

初入CR,我是廣告創作部的一員,title是初級撰稿員(junior copywriter),日常工作包括寫廣告、度客戶的贊助環節及其他ad hoc企劃。97年電腦開始普及,很多公司的日常事務已依靠電腦去處理,CR在這方面是相當落伍,初入職的時候,整個部門只得一部電腦,那更是一部不能上網的智障PC,主要用來整理錄音booking或賬單的。所以我們當時是用格仔紙寫稿的,亦即“爬格仔”,retro至極!而寫稿的程序是這樣的:營業部首先會向我們阿頭落“job brief”,上面會詳述廣告所需包含的內容,例如:
‧產品名稱
‧產品特點 (unique selling point)
‧廣告長度 (電台廣告一般可分為10秒/20秒/30秒)
‧客戶所指定的配音員
‧廣告推出時段
阿頭接到job brief後會分派與不同撰稿員,我們先要自行腦震盪,然後草擬一個初稿與組長(group head)過目,當時部門共分為3組,每組4個人,若組長認為無問題的話,就交與阿頭作最後批。
如果阿頭亦認為噢畸就會簽個大名,再傳真回營業部,好讓其他同事進行後期工序.. 以下是在下入台初期所寫的一個廣告稿, 但最終這個稿有沒有出街就不太記得了~~

2.27.2008

告別‧廣播道 (97/9/15 - 08/2/27)

見人哋last day就見好多,
今日終於到自己,感覺好.. 遊離,好似發夢咁~
呢十年時間過得好快,快到係.. 有啲措手不及!
當我拎住個一百個蛋撻由天台派到地庫,
經過每個部門既時候,個感覺好似第一日返公巡樓認識新同事咁~
呢度真係一個好鬼異既地方,啲人好無聊好癲好喪,但係又好叻,
所以作為飲CR奶水大既我,能夠有機會喺度做,
仲一做十年,勁難得啦吓嘛~

08年2月27日,Fun@CR
既最後一日,
今日我係點過既呢?
你有無興趣知先?
有既就繼續睇落去啦~

由銅鑼灣搭地車去九龍塘出D出口,然後搭29A專線小巴就去到CR架喇~
一落小巴即刻衝入門口,首先經過,左:接待處;右:然後搭lift上樓~
CR一共樓高四層,我就坐喺三樓既~
一早返到就有同事買定早餐:熱奶茶($5.5)/奶油多($6)
一樓:直播室/錄音室/工程部/新聞部就喺晒一樓~
左:雲妮,都係蓮教信眾,多謝你首蓮歌;右:二台直播室左:PR房一角;右:平時啲artist就喺度見記者做訪問~
CR PR gals~
六號錄音室:所有廣告都喺度錄架~
左:confrence room,開大會之地;右:新聞部 (有時會閃落嚟偷睇電視架)
晏晝去九龍城街市食至愛既,左:叉燒餐蛋飯;右:我啲同事呀
左:咪先咪先,芝see姑bi;右:余迪奶 (你今個禮拜六係咪去蒲架?)預訂咗既100個泰昌(散水)蛋撻送到嚟啦~ 總共派咗兩粒鐘,勁累~
CR天台風光,左:我哋大家在獅子山下.. ;右:見到港台添架
左:正音王朱薰E;右:阿奴,多謝你送首《神奇女俠的現代生活》俾我囉~
左:二台監制阿如;右:食字怪梁光,你唔識佢?唔係掛~
孖寶:Malaya&Heison;喂我哋把口咁衰,一齊落地獄架啦~
左:細蘇太阿Wing;右:何秀萍女士
合作最多既美術部同僚,全部都係無聊怪呀~
其中一位德高望重既老臣子,人稱校長既Cindy,公司咩都要經佢~
我的team~
Fun去留空啦~

CR日與夜.. 再邂逅是那天..

2.26.2008

告別

2月27日..
是我告別廣播道的日子..
一件想了好幾年的事情..
冷不訪只考慮了3天便成事..
很典型的天秤座性格..
現在的心情好複雜..
既期待又擔心..
不過..
未來的日子應該會噢畸的..
我會好好過Fun生活!

這是我的辦公桌,明天將會如何呢~~

2.25.2008

奧斯卡時裝秀08

《第80屆奧斯卡頒獎禮》終在有驚無險下順利落幕,阿彌陀佛!
首先恭喜各個得獎單位,欲知詳盡名單各網友可瀏覽Donald Movie
每年奧斯卡本人最關心的除了賽果之外,當然是眾女星的戰衣啦,
觀乎今年的選衣趨向,單膊設計及紅色絕對是熱門選擇,
好啦就等我化身Nel Nel選出今年奧斯卡最劣及最佳晚裝獎得主啦!


最劣晚裝獎

‧第5位 - Tilda Swinton in Alber Elbaz for Lanvin
‧英國型女憑《敵對同謀》中的律師角色擊敗熱門Cate Blanchett贏得本屆最佳女配角獎項。本身皮膚已經白過白紙的Tilda,再配以超淡化裝及黑色長裙亮相。個人認為這身打扮實在太素了,有點“一見發財”feel,適合去葬禮多過頒獎禮。晚裝的設計更有點不倫不類,既想走型格路線又想保留一點莊重,結果兩頭唔到岸。


‧第4位 - Marion Cotillard in Jean Paul Gaultier
‧ 法蘭西女星一擊即中最佳女主角獎項,她在《La Vie En Rose》真是技驚四座,實在贏得漂亮。說回Marion Cotillard 這身美人魚打扮,出席此等隆重場合,選上玩味十足的JPG實屬不太明智。首先胸部設計好怪雞,搞到雙峰好長好墮,而週身“魚麟”亦太過over,令人有點毛管棟的感覺。還有那條劃蛇添足的頸鍊也可以棄掉。



‧第3位 - Amy Adams in Proenza Schouler
‧看《Enchanted》的時候覺得作公主打扮的Amy Adams 幾可愛,但結尾當她一換上現代服,登時娘味十足。估不到今次出席Oscar亦有同一毛病,這套綠色晚裝實在娘到不能,胸部很像一副近視眼鏡,下身剪材又不夠貼身,鬆拋拋,做不到搖曳效果之餘更令腰肢顯得非常水桶。另外髮型亦有點過時,如果把頭髮束起可能較好。


‧第2位 - Ellen Page in Jean Louis Scherrer from Decades
‧數天前Ellen Page接受訪問時說近日為出席Oscar的服裝而煩惱,她還做了一個惡夢。Ellen 在夢中被設計師放蕉皮,只嚷她穿牛仔褲行紅地毯,結果劣評如潮。觀乎這晚小妮子所穿的晚裝,得到的評價可能跟穿牛仔褲差不多。只得21歲的Ellen Page刻意扮成熟,阿媽髮型、阿姨頸鍊、鬆身層層疊黑色長裙更把身型矮小的她顯得更矮更小,一句講晒:徹底失敗。


‧第1位 - Julie Christie in a original designed with her stylist/costume designer Tanya Gill.
‧現年66歲的Julie Christie曾於65年得過最佳女主角,今番再獲提名自然希望著得靚靚再踩紅地毯。最終她捨棄名牌,找來相熟設計師“阿嬌”設計了這件.. 慘不忍睹的紅色戰衣。首先我覺得出席Oscar怎能不穿一件floor length的長裙呢?另外質料上亦有問題,驟眼看以為是入焗爐的錫紙,不過最敗筆是那一雙九唔搭八的長手襪,正一多舊魚。唯一可讚的是清爽微曲的短髮令Julie Christie看上去只像40來歲。


最佳晚裝獎

‧第5位 - Calista Flockhart in vintage Valentino
‧曾經瘦得相當恐怖的Alley Mcbeal,今次主要做跟德夫人,陪伴愛郎Harrison Ford出席頒獎禮,所以服飾也偏向低調,淺藍色雪紡長裙設計簡單,配上灰色腰帶稍作點綴,很清麗。而把頭髮束成高髻則令整體感覺多了一份高貴氣質。


‧第4位 - Nicole Kidman in Balenciaga
‧今年Oscar十分多大肚女星,例如:Cate Blancett、Jessica Alba及Nicole Kidman。你說我偏心也好,甚麼都好,總之Nicole Kidman真是著乜都靚。今年繼續選了Balenciaga的晚裝,黑色令懷有身孕的她看上最比較輕型,簡約設計亦減輕了累贅感,全身只配上一條圍了三圈共1339卡的巨型鑽石頸鍊,夠晒。總之,less is more always works on Nicole Kidman~


‧第3位 - Katherine Heigl in Escada
‧憑《Knocked Up》及《27 Dresses》上位的Katherine Heigl首次踏上紅地毯,挑選了大熱的紅色及單膊設計晚裝,貼身剪材盡顯玲瓏身段,既性感火辣又不失高貴,配上復古髮型,搶眼至極。不知為何,當我第一眼看到Katherine Heigl的造型時,覺得很像SATC的Samantha Jones。


‧第2位 - Hilary Swank in Versace
‧從來都走偏鋒強悍路線的Hilary Swank,今年在《P.S. I Love You》中初以靚女姿態示人,反應好壞參半。今年以一身Versace單膊黑色拖地晚裝示人,腰間至下擺有點透視,很誘惑。而簡潔的髮型配上適量的珠寶已經夠壓場。


‧第1位 - Heidi Klum in John Galliano Haute Couture
‧事前有消息傳出Heidi Klum會穿著Runway Project參賽者的晚裝出席Oscar,最後原來是煲水!最後超級名模穿著了John Galliano 的高級頂造服登場。產後極速收身的Heidi Klum憑5呎9吋的身高穿起這件設計極其誇張的晚裝,就如女皇出巡一樣,霸氣十足,型到不得了。

2.23.2008

食錯藥

我成日同啲朋友講,想我死好易,只要趁唔覺意掉一粒阿士不靈落我杯嘢飲度,然後等我藥物敏感發作兼唔准我去睇醫生,咁我就係咁大~ 記得第一次意識自己有藥物敏感係頭一年去加拿大讀書,嗰次因為大感冒,家姐俾咗兩粒阿士不靈我拍,點知.. 過咗15分鐘之後隻左眼開始好痕同狂標眼水,初初以為係感冒病徵,點知話咁快就連眼蓋同眼袋都腫起嚟。家姐見到我迅間變豬頭,嚇到即刻飛車同我入院,醫生一睇就話係藥物敏感,以後唔可以掂阿士不靈或者散利痛,跟手仲寫咗張咭俾我袋住,萬一有咩事啲人都知我藥物敏感!

後來返咗嚟香港,經朋友介紹下遇上林醫生,一睇就8年,最初佢曾經開過一啲阿士不靈或者散利痛以外既止痛藥俾我,點知都出過幾次事,摸吓摸吓先知我受得邊幾隻藥。喺呢幾年,都曾經試過有三/四次藥物敏感,主要都係自己唔聽話,亂食成藥出事,而呢幾次既情況就更加一次比一次嚴重,唔單止眼腫,連呼吸都有啲困難。醫生話年紀越大通常情況會嚴重架喎,唉~~ 又係關年紀事!

好啦,話說上個weekend開始,我既左邊頸近膊頭位置開始赤赤痛,過多兩日連右手都被扯到好痺,到咗星期三直情痛到坐立不安。於是我即刻打電話去卜睇開個嗰therapist,點知佢要禮拜六先有期,咁無辦法唯有拍住panadol頂住先,但係完全無幫助囉。禮拜三一起身,哇.. 仲痛咗添,喺lunch既時候我短訊朋友L (佢屋企係開藥房),問佢有邊隻勁啲而我又受得既止痛藥 (佢係知我有藥物敏感)。於是我聽佢既意見買咗一隻V字頭既止痛藥,一食.. 真係噢畸喎,起碼減低咗4成痛楚。跟住返到公司做咗大概兩個鐘頭嘢,突然間左眼開始標眼水,又痕痕哋.. fxxk,又中招!?!呢次情況如醫生所講,又比先一次嚴重,唔駛5分鐘隻左眼已經腫起晒,呼吸又開始唔係好暢順,而我個豬頭樣就更加嚇親周圍啲同事。於是我即刻飛的過海去家庭醫生度啦,喺途中我越嚟越辛苦,左眼腫到得返一條線既同時,右眼亦都開始腫,又不斷標眼水鼻水,呼吸亦越嚟越辛苦,當時個心真係慌到不得了!一衝入診所,我都唔理得其他病人咁多,即刻同姑娘講話好辛苦,姑娘見到我咁既樣都即刻叫其他人讓一讓路。一見到醫生我即刻拎個排V字頭既藥佢睇,佢話:呢隻都少人敏感架喎.. 你下次買成藥打俾我問下先嘛。嘩,你今次好嚴重喎,連眼球都漲大,同你打支針先然後再食抗敏藥,20分鐘度會鬆啲架啦。跟住我過咗另一邊個細房訓咗大概一個鐘先好返啲,然後再休息多一陣至可以慢慢爬返屋企,一路上我一路垂低頭,好鬼驚俾人見到個豬樣。由於今次真係腫得好利害,要成差不多3日先還原真面目,辛苦晒~ 我話過以後有咩事都會打俾醫生問吓先架啦~~ 朋友L,你又唔駛內疚既,你又唔係有心,總之他日我有咩衫長褲短,你記住第一時間仆出嚟話俾啲人知我有咩藥係食得架啦!

有朋友問我個豬頭樣係點架喎.. um.. 我諗諗吓係有啲似中國超模燕囉!兩隻眼都係得一條線,只不過係我個對眼大概腫多4倍之嘛~

2.21.2008

CR回憶錄之Fun與星

入台十年,每日都有機會在公司遇上各大中小奀星,
有時候還得跟他們打交道,友善的會嘻嘻哈哈,
遇上那些黑口黑面的也要裝若無其事,因此我絕少會討合照的,
除非.. 那些是自己真心喜歡的又或是某些因素使然吧。
最近因要清理公司的電腦檔案,所有“私人珍藏”都需鏟走,
在清理過程中發現了一個名為“Fun&Star”的folder,
裡面有以下照片,跟大分享一下吧:

1. 98年12月 - 當時甸妮因接拍了亞視的“縱橫四海”而四出宣傳,這張合照是攝於她接受查小欣訪問之後。除合照外,我還拿了一大堆黑膠給她簽名,甸妮還鬼馬地說:哈哈,乜你仲未掉落鹹水海咩?而合照上的簽名是05年她接受“叱咤樂壇”訪問後給我簽的。

2. 00年1月1日 - 99至01年度的叱咤頒獎禮我都負責歌手得獎後第一手訪問。99年度莫文蔚憑著《回家》及《冷雨》等高播放率作品,摘下了一枚《叱咤東方飛碟》大獎。Karen本身已很nice,那晚得獎後比平常更輕鬆,所以訪問後跟她合照了。


3. 00年1月1日 - 很懷念那個年頭的叱咤,還有王菲呀~ 那一年王菲憑《郵差》得叱咤十大外,還得了全場觀眾一人一票決定的《叱咤樂壇我最喜愛的女歌手》 。相裡的阿菲無乜笑容啊呵?搞到我都好像緊張起來,其實拍照後阿菲是有禮貌地說了一聲“唔該”架~


4. 00年1月1日 - 那一晚許志安威風八面,穿上一身粉紅戰衣首奪《叱咤樂壇男歌手》金獎。台後他興奮得熱淚盈眶。一直覺得許志安都很努力求變,唱功又紮實,可惜近年因傳媒萬箭插背而失去了一批支持者。希望安仔能抬著頭向前走吧,李黑人都可以翻身,你好過他百倍呀~


5. 00年8月31日 - 攝於00年拉闊第3場張信哲x王力宏的後台,那次是其中一個最具水準的拉闊音樂會,兩位音樂才子實在造就了一次完美的化學作用。Leehom真人比上鏡還要帥,又溫文有禮,實在靚到不能喔~ 大家係咪好妒忌呢? 當晚成個後台的男男女女都爭崩頭跟他合照,足足影了15分鐘。


6. 00年11月1日 - 00年拉闊陣容非常強橫,除了張信哲、王力宏還有哥哥及壓軸上台的蓮母!演出後我得到後台訪問蓮母,那次是我首次近距離接觸她,手藤又腳震,幸好有驚無險完成了工作,一額汗呀~


7. 01年1月1日 - 楊千嬅真正走上一線的一年,這夜她擊退陳慧琳首奪《叱咤樂壇女歌手》金獎,在台上哭得死去活來,“我無幾千萬堆頭,心口得個勇字”的感謝辭更成為了日後的金句。如果你細看的話,照片裡的千嬅還是眼紅紅的呢~


8. 01年1月1日 - 00年蓮母憑《至少還有你》紅遍中港台,連《叱咤東方飛碟》大獎也落在她的手中。那夜她並未有接受任何媒體訪問,我在她臨離場之際捉著她用polariod合照。這次亦是蓮母最後一次踏足叱咤舞台了,之後雖憑《日與夜》及《下落不明》得叱咤十大,但卻沒有現身呢!