5.28.2007

回憶總是Fun的 - 東瀛樂壇篇 ( 一発屋伝説:清新音樂噴霧 - H2O)

H2O,來自長野県的2人男子組合,成員包括:中沢堅司(出生日期:57年6月12日及赤塩正樹(出生日期:57年4月27日)。跟“安眠”一樣,中沢及赤塩因就讀同一所大學而認識,因興趣相投而走在一起。76年結成H2O後很快便得到KittyRecord垂青,80年正式出道,首張細碟為6月21日所推出的《Rorerai/Spanish Glasses》,此曲亦同時被選為藥師丸博子所主演之電影『飛翔的二人』的插曲。H2O曲風清新怡人,又帶點民歌味道,所以很快便吸納了一批大學生歌迷。83年3月25日,H20推出全新細碟《滿懷回憶》(想い出がいっぱい),此曲正是卡通片『美雪』(改編自安達充漫畫)的片尾曲。在電視及電台打孖合力催谷下,歌曲很快便大熱起來,以高速登上Oricon細碟榜亞軍位置,銷量突破50萬張。當時連日本小中學校文部省都要將這首歌列入音樂教科書中,足可見其受重視程度。84年,H2O除了發展自己的歌唱事業外,還為其他歌手擔任和音工作,例如:柏原芳惠的細碟《震音》之background vocal就是H2O了。

可惜自《滿懷回憶》後,H2O所推出的作品都未能掀起話題,成績平平,在流行榜上的表現更加乏善可陳。85年,2人決定推出全新大碟《Next Corner》後便舉行告別演唱會,解散後會分別進行個人發展。

99年,由於長野県慶祝上野市建市80周年,特別邀請了同樣出身於長野県的H2O作短暫的重組,並主唱官方主題曲。

註:《滿懷回憶》的廣東版為譚詠麟的《愛的替身》,歌曲收錄於『霧之戀』專輯內


83年的電視演出片段

卡通片『美雪』之片尾MV

5.26.2007

回憶總是Fun的 - 東瀛樂壇篇 (一発屋伝説:安眠)

女子組合安眠(あみん),由兩位出身於愛知県的女孩子所組成,她們分別是岡村孝子(出生日期:62年1月29日)及加藤晴子(出生日期:63年1月2日)。2人由於同時入讀椙山女学園大学而結識,因為大家都酷愛音樂創作,所以很快便成為手拍交。81年秋天,2人決定以組合形式參加第22回Popular Song Contest,最後更和議取名為『安眠』。(註:『安眠』是來自男歌手佐田雅志其中一首歌《南瓜批與檸檬茶》裡的一句歌詞,原是一間喫茶店的店名)。最後『安眠』憑著自己創作的作品《琥珀色的回憶》(琥珀色の想い出)得到中部北陸大會優秀曲賞,獲進軍全國大會資格。82年5月『安眠』再以另一首自作業《等待》(待つわ)。參加全國大會,不單獲得全場總冠軍,更獲得唱片公司垂青,簽約成為歌手。同年7月21日正式出道,首張細碟就是《等待》。由於歌詞能細緻地寫出少女盼望戀愛來臨的那份忐忑心情,所以細碟一推出就受到很多不同年齡層的女生歡迎,細碟極速登上Oricon細碟榜冠軍位置,並停留長達7個星期,銷量衝破百萬大關,成為82年度最高銷量細碟,風頭一時無倆。到了12月再接力推出《琥珀色的回憶》,最高也曾攀升至第9位,而年末盛事『第33回紅白歌合戰』,『安眠』當然被邀列席對抗白組。

踏入83年,『安眠』乘勝追擊,於4月25日推出首張大碟《P.S.給你》。但可惜在灌錄這張大碟期間,2人跟唱片公司在選曲上出現意見分歧,因而鬧得很不愉快,再加上成員加藤晴子的個人意向,埋下了『安眠』解散的危機。同年12月,『安眠』決定舉行過全國巡迴演唱,及推出大碟《Memorial》後便會解散,往後岡村孝子會作個人發展,而加藤晴子則會退出樂壇。經過年半的休息,岡村孝子終於85年10月19日,以創作女歌手身份推出首張個人細碟《風是來自海洋的》,其後一直活躍樂壇至今,到目前為止,岡村已共推出了32張細碟及15張大碟。而加藤晴子則於大學畢業後成為了OL,及後更嫁人去了。雖然2人各自選擇了不同的路,但感情多年來依然要好,加藤晴子更曾於02年亮相岡村孝子的演唱會及參與其唱片和音工作。

07年,是『安眠』踏入樂壇25週年紀念,2人為紀念這段深厚的友情,因此決定復出大計,除會於6月20日推出新細碟《向日葵》及7月25日推出全新大碟《In the Prime》外,更會於8月24日至9月15日舉行《25th Anniversary Aming Concert Tour 2007》!

2007年的安眠(左:岡村孝子/右:加藤晴子)
最新細碟『向日葵』封面
82年的安眠
在第33回紅白歌合戰(82年)中演唱《等待》
07年再次入選紅白歌合戰

5.23.2007

回憶總是Fun的 - 東瀛樂壇篇 (一発屋伝説:詩人歌手 - 村下孝蔵)

村下孝蔵,1953年2月28日出生於熊本縣水俣市。小時候因家裡經營映画館,所以有機會接觸西方音樂文化。高校就讀於鎮西高等學校的村下,是游泳隊活潑份子。當時課餘時候除了游水,他最喜歡的就是拿著結他大唱加山雄三的名曲。高中畢業後,村下進了廣島Yamaha任職鋼琴調音師,與此同時亦開始嘗試作曲作詞。不久,其作品已在廣島地區的電台有不俗的播放率。

1979年,村下參加了CBS Sony主辦之『第一回SD Audition』獲得最優秀Artist賞因而簽約成為歌手,同期的還有另一創作歌手堀江淳。80年5月21日,村下正式出道,推出首張細碟《月明》,由於曲風清新純樸,歌詞細膩動人,因此被喻為『詩人歌手』。其後於81年及82年所推出的《春雨》及《裕子》也大受歡迎。但真正令村下走上事業高峰的就必定是於83年2月25日所推出之細碟《初戀》!由於《初戀》旋律搶耳,歌詞窩心,所以一推出就馬上大受歡迎,尤其得到大學生的熱烈追捧,細碟更火速登上Oricon細碟榜,最高上升至第3位,銷量衝破50萬。由於歌曲大受注目,因此連偶像歌手三田寬子也急不及待翻唱,但成績一般。83年的上半年,村下可說是日本樂壇最矚目的歌手之一,幾乎每個電視台的音樂節目都會邀請他亮相。《初戀》不單只紅遍日本全國,連香港的電台也大力催谷。我記得當時歐瑞強經常在其節目中power plug《初戀》,還笑說不知那一位香港歌手會改編成廣東版,結果廣東版到了84年才出現,主唱的是斯文玉女林志美。

經過《初戀》的成功,村下繼續全力衝刺,緊接推出的細碟《舞娘》、《少女》及《夢延續》也有不錯的銷量,可惜其後所推出的細碟都表現平平。雖然事業走下坡,但村下並沒有放棄,一直堅信好歌有好報,踏入90年代他以開演唱會為主,地點遍佈全國,甚至連偏遠的地方也曾踏足。

1999年6月20日,村下在其演唱會綵排途中突然暈倒,送院後被證實因高血壓引至腦部出血,經過4日急救後終告不治,享年46歲。而村下的遺作是他為演歌女歌手香西香所寫的《送給你》。

年輕時代的村下孝蔵
村下孝蔵也認為『初戀』是他的代表作
村下表示很享受唱live的感覺
90年代後期於NHK音樂節目《NHK歌謠Concert》中的演出
於另一音樂節目中的演出

5.22.2007

小小笑..

天陰陰,雨矇矇,個人特別掩悶..
尤其今日只係星期二,悶上加悶..
啱啱偷雞揭雜誌見到有以下笑話一則..
我有小小笑,唔知你又點呢 ..

5.21.2007

回憶總是Fun的 - 電視劇篇 (山水有相逢無獎答問大會 - 答案公佈)

唔好意思,遲咗成10日先公佈添

低b級 (2分1題)
1. 喺戲入面黃韻詩同賈思樂係咩親戚關係? --> 姨婆同姪孫
2. 邊一個飾演梅妹個女? --> 呂有慧
3. 邊一個飾演梅劍仙個契女?--> 張德蘭
4. 朱伯伯揸fit嗰間電影公司叫咩名? --> 天山影業
5. 紫紅女由邊個飾演? --> 黃敏儀
6. 梅妹第一套擔正既影畫係? --> 夜祭珍妃
7. 綽號『美艷親王』既係邊個? --> 雪艷芳
8. 梅劍仙喺香港邊個地方出身架? --> 大澳
9. 劇入面梅妹、梅劍仙同雪艷芳成日唱住嗰隻『奴奴艾甩U』其實首歌既歌名係咩呢? --> Rose Rose I Love You
10. 梅劍仙喺『雙天鬥至尊』其中一幕中,揸住支槍喺樓梯衝落嚟指住其中一個新袍問:家嫂,借問聲你吼我死咗個陣柄埋咗我嗰對xxx喺邊呢?咁xxx係代表咩? --> 龍鳳鈪

中b級 (3分1題)
1. 梅劍仙最鍾意哼嗰隻『悲聲呼叫似鬼叫,悲聲呼叫過路上山行橋,臨崖遠眺..』,呢支曲其實叫乜名? --> 一代天嬌之餓馬搖鈴
2. 九叔燒開邊隻派子既香煙? --> 鴨都拿
3. 梅妹、梅劍仙同雪艷芳喺宿舍受訓期間有兩個師父分別教佢哋演技同粵劇功架,咁邊個演員教演技/咁邊個演員教粵劇功架呢? --> 陳有后/江毅
4. 『雙天鬥至尊』有兩個導演,是但講其中一個演員啦? --> 程思俊/林偉健
5. 梅劍仙話邊隻驅風油聞得佢最舒服? --> 阿咪古
6. 梅妹個孫既英文名係咩? --> Bobby
7. 梅妹成日話會同靳玉褸去邊一個地方批薯仔? --> 山打根
8. 『雙天鬥至尊』既記者招待會喺邊個地方舉行架呢? --> 馬會
9. 雪艷芳最後嫁咗俾一個從事咩職業既人呢? --> 醫生
10. 梅妹喺靳玉褸失約之後走咗去南洋登台,佢一出場就發生咗咩意外呢? --> 響韆鞦撻咗落黎

高b級 (5分1題)
1. 根據梅劍仙所講,佢第一部擔正既影畫『香城妖姬』最後埋單有幾多票房? --> 9千幾唔夠1萬
2. 陳安瑩(而家喺同事三分親入面做掃地阿嬋嗰位)曾經喺劇中出現過兩次,但係兩次都唔同角色,咁佢究竟喺邊兩幕出現過呢? --> 高竇售貨員/向梅妹索取簽名既影迷
3. 喺『夜祭珍妃』首映第二朝,梅妹買咗邊兩份報紙睇吓有無自己既新聞? --> 工商/真欄
4. 梅劍仙喺化妝間用交剪狂插靳玉褸嗰一幕,雪艷芳當時其實係拍緊戲,咁佢當時係拍緊邊套戲呢? --> 女黑俠黃鶯
5. 喺靳玉褸要同梅妹搭船離開香港嗰晚,梅妹用咩方法留住靳玉樓等佢趕唔切上船? --> 教慢靳玉樓隻錶
6. 黃韻詩同梁碧玲既一段戲中戲提到.. 梁:Peter仔已經知道咗我黑野貓既身份~~ 黃:佢點會知道架?究竟Peter仔點解會知道梁碧玲黑野貓既身份呢? --> 係奶媽忍唔住要話俾Peter仔知
7. 梅劍仙喺『香城妖姬』入面,最後係點死架呢? --> 碌落樓梯吐血死
8. 梅妹原本第一套踩既映畫係同白丹鳳合演既,套戲叫咩名? --> 艷陽斜照牡丹紅
9. 梅妹同梅劍仙合演古裝武俠劇,其中一幕佢哋被困山洞,最後二人合力洗出邊一招去對付敵人? --> 九指連環雙鳳飛
10. 某日梅妹同梅劍仙拍『雙天鬥至尊』放食晏既時候撞返九叔,咁九叔當時係做緊咩呢? --> 幫人開車門

5.14.2007

我要你每夜陪住我

07年5月12日,星期六,一夜限定,林公子40大壽!
承蒙千面女郎李莉莉大駕光臨旺角紫荊大酒樓貴賓廳,
喪人遇上喪人,喪笑喪嗌喪跳!
她出現的一刻,我的血壓肯定狂升過200,
從未試過因為興奮過度而頭痛,事後要拍必理痛呀!
經過這一夜,我彷彿像消耗了幾年青春,快樂其實可以很簡單,
多謝夾盛惠,畢生銘感
請目擊當晚盛況之空前 ->

李莉莉小姐一身紅衣亮相,與林公子很匹配呢!

李莉莉絕不欺場,預先手抄兼影印了大疊歌詞,現場一人一張跟住唱,蠻像宗教活動啊!

賓客陳麗文獲贈李小姐真跡,喜上眉梢!

其中一位賓客興奮得擺出勝利手勢

紅衣者為在下之好同事繆小皮,當晚其中一位喪嗌賓客!
F4為李小姐演繹的“愛無限界”作獨白部份的演出,表現達職業水平!
演繹“四大金剛”前,李莉莉邀請了4位賓客伴舞,她還準備了4件DIY tee啊,很有心思! “莫再等等等等一錯再錯”, 一曲“我要你每夜陪住我”掀起全晚高潮!
Fun與Lily
李莉莉還帶了10張“白髮為你留”專輯到場售賣,每張$35,現場反應熱烈,不消一會已一掃而空,我也買了一隻呢

5.10.2007

溏心勳暴

細契話『新的一頁』隻碟應該係無珍珠末成份
細契保持得好好,近睇d皮膚都好ok
大契&Fun
我有同大契講話我識背晒成套山水有相逢,佢話:你咁細都有睇過?
仲有佢都話VCD版cut咗好多頭頭尾尾呀!

5.04.2007

回憶總是Fun的 - 電視劇篇 (山水有相逢無獎答問大會)

一齣『溏心風暴』攪到好多觀眾對李司棋同關菊英既演技另眼相看,唔單止年長一輩大讚,就連後生一脫既電視迷都直豎姆指。有關細契既資料大家可以去右邊既連結『Come Back to Love』嗰度睇睇,至於大契就等我嚟啦!

李司棋出身於小康之家,爸爸係玉泉汽水廠既會計主任,細個既時候同我一樣住喺銅鑼灣,中學就讀於蘇浙公學,同汪阿姐係同校同學。17歲就瞞住屋企參加1968年香港小姐競選,諗住化名高京慧就神不知鬼不覺,點知入選之後成為大熱門,李爸爸一睇報紙就認出自己個女。李爸爸發現之後大力反對,仲要佢退選,後來好彩得到主辦單位出面大力遊說先可以繼續參賽。最後李司棋不負眾望,喺總決賽入面得到最高分,雖然理應當選香港小姐,但係香港小姐就必須年滿18歲,因為要代表香港去美國參加環球小姐,所以她只可以獲選為次一級既香港公主,去澳洲參加太平洋皇后選舉。

其後李司棋參加咗麗的呼聲訓練班,同班同學有黃韻詩,70年代初簽約無線,話咁快就已經成為一線花旦,同黃淑儀及汪明荃齊名,代表作包括有啼笑姻緣(74年)、書劍恩仇錄(76年)、強人(78年)、輪流轉(80年)同流氓皇帝(81年)等等。但若要我揀一套最拍爛手掌既就必定係由甘國亮一手編導監既山水有相逢(80年)啦。山水有相逢雖得10集,但集集精彩camp到暈,啜核對白足足可以湊成一本書,而兩個女主角李司棋同黃韻詩既演出就更加係媲美如來神掌大戰天殘腳!據聞演藝學院既戲劇系亦曾經用過其中一啲情節做教材,你話幾堅!仲有,如果當年已經有嗰啲乜乜物物台慶最佳女主角獎,我敢肯定佢兩個鬥得仲勁過阿佘同肥田。

我知道坊間有好多『山水』迷(包括我自己),對當中既情節同對白都熟到不得了,就襯大契呢期紅成咁,等我整一個『山水有相逢無獎答問大會』啦,各位參加者最好就唔好翻睇完VCD先嚟答喎!

題目分3級,每級10題,總分為100分,大家慢慢玩啦,答案會於7日後公佈:

低b級 (2分1題)
1. 喺戲入面黃韻詩同賈思樂係咩親戚關係?
2. 邊一個飾演梅妹個女?
3. 邊一個飾演梅劍仙個契女?
4. 朱伯伯揸fit嗰間電影公司叫咩名?
5. 紫紅女由邊個飾演?
6. 梅妹第一套擔正既映畫係?
7. 綽號『美艷親王』既係邊個?
8. 梅劍仙喺香港邊個地方出身架?
9. 劇入面梅妹、梅劍仙同雪艷芳成日唱住嗰隻『奴奴艾甩U』其實首歌係叫咩名呢?
10. 梅劍仙喺『雙天鬥至尊』其中一幕中,揸住支槍喺樓梯衝落嚟指住其中一個新抱問:家嫂,借問聲你吼我死咗個陣,柄埋咗我嗰對xxx響邊呢?咁xxx係代表咩?

中b級 (3分1題)
1. 梅劍仙最鍾意哼嗰隻『悲聲呼叫似鬼叫,悲聲呼叫過路上山行橋,臨崖遠眺..』,呢支曲其實叫乜名?
2. 九叔燒開邊隻牌子既香煙?
3. 梅妹、梅劍仙同雪艷芳喺宿舍受訓期間有兩個師父分別教佢哋演技同粵劇功架,咁邊個演員教演技/邊個演員教粵 劇功架呢?
4. 『雙天鬥至尊』有兩個導演,是但講其中一個演員啦?
5. 梅劍仙話邊隻驅風油聞得佢最舒服?
6. 梅妹個孫既英文名係咩?
7. 梅妹成日話會同靳玉褸去邊一個地方批薯仔?
8. 『雙天鬥至尊』既記者招待會喺邊個地方舉行架呢?
9. 雪艷芳最後嫁咗俾一個從事咩職業既人呢?
10. 梅妹喺靳玉褸失約之後走咗去南洋登台,佢一出場就發生咗咩意外呢?

高b級 (5分1題)
1. 根據梅劍仙所講,佢第一部擔正既影畫『香城妖姬』最後埋單有幾多票房?
2. 陳安瑩(而家喺同事三分親入面做掃地阿嬋嗰位)曾經喺劇中出現過兩次,但係兩次都唔同角色,咁佢究竟喺邊兩幕出現過呢?
3. 喺『夜祭珍妃』首映第二朝,梅妹買咗邊兩份報紙睇吓有無自己既新聞?
4. 梅劍仙喺化妝間用交剪狂插靳玉褸嗰一幕,雪艷芳當時其實係拍緊戲,咁佢當時係拍緊邊套戲呢?
5. 喺靳玉褸要同梅妹搭船離開香港嗰晚,梅劍仙用咩方法留住靳玉樓等佢趕唔切上船?
6. 黃韻詩同梁碧玲既一段戲中戲提到 - 梁:Peter仔已經知道咗我黑野貓既身份~~ 黃:佢點會知道架? 究竟Peter仔 點解會知道梁碧玲黑野貓既身份呢?
7. 梅劍仙喺『香城妖姬』入面,最後係點死架呢?
8. 梅妹原本第一套踩既映畫係同白丹鳳合演既,套戲叫咩名?
9. 梅妹同梅劍仙合演古裝武俠劇,其中一幕佢哋被困山洞,最後二人合力洗出邊一招去對付敵人?
10. 某日當梅妹同梅劍仙拍『雙天鬥至尊』放食晏既時候撞返九叔,咁九叔當時係做緊咩呢?