9.10.2008

日本歌姬傳說 - 安室收復失地

娛樂圈從來都是偏門(行業),努力跟收獲未必成正比。天要你紅,你擋也擋不來,天要你沉,管你如何掙扎也是徒然。

被譽為日本一代歌姬的安室奈美惠,95至98年間雌霸整個日本樂壇,96及97年更以19歲之齡連奪兩屆日本唱片大賞,平了中森明菜的紀錄(後來被浜崎步打破,她於01-03年連奪3屆大賞)。及後安室的聲威更伸延至台灣及香港,當年就連新城DJ郭偉安也有個節目叫《安室內電話》,可見她的受歡迎程度是何等厲害。當時在下也是她的超級粉絲,幾首大hit作品例如:《Try Me》、《Body Feel Exit》、《Don't Wann Cry》、《You're My Sunshine》、《Can You Celebrate》真是日聽夜聽,幾乎掉轉頭也曉唱。而正當事業如日中天之際,安室突然宣佈懷孕及停止活動一年待產,而腹中塊肉的爸爸就是跳舞組合TRF的成員Sam(最後兩人於02年離婚)。98年12月安室全面復出,聲勢依然浩大,但可惜一踏進千禧年,隨著浜崎步的冒起,事業便開始走下坡,霉耷程度雖不及當年的明菜,但也已非當日那個呼風喚雨的歌姬了。

雖然歌唱事業不太順心,但安室並未因此而變得消沉,反之她不斷尋求新出路。近年安室轉唱最受日本年青人酷愛的hip hop音樂,萬料不到非常受落,今年3月12日發賣的細碟《60s70s80s》更初上榜即佔Oricon細碟榜冠軍,成為安室9年以來的首張冠軍細碟,銷量超過29萬張。眼見形勢大好,唱片公司Avex乘勝追擊於7月30日為安室推出出道以來的第4張精選大碟(連DVD) -《BEST FICTION》,專輯網羅安室02至07年的細碟歌曲,結果大買特買,第一週銷量已高達68萬張,直到上星期為止已連續5星期成為冠軍,而對上一張5連冠大碟(由女歌手主唱)已是24年前,屬於中森明菜的精選專輯《Memorial - Best Akina》了。今個星期《BEST FICTION》以5萬5千張的銷量繼續站穩陣腳,累積銷量已達129萬張,是本年度(暫時為止)的最高銷量大碟,安室可以說是全面收復失地了!假如下週《BEST FICTION》仍能力保冠軍的話就將會打平久保田早紀的《夢がたり》大碟於79年創下的7連霸紀錄。然而這個可能性不大,因為千禧歌姬浜崎步已於9月10日推出精選大碟《A COMPLETE ~ALL SINGLES~》,下週如無意外應輕取榜首位置。

兩代歌姬接棒上榜名場面,實屬10年難得一見,絕對是歌迷的福份。

安室奈美惠於音樂節目演繹《60s70s80s》

文中所提及的《Memorial - Best Akina》,我也有買黑膠呀!左:日本版大碟最令人懷念之處肯定是那條紙條啊;右:封底,白色部份有很多黑點呢;左下:雙封套設計,一打開有個超靚的中森明菜;右下:歌詞.. 其實隨大碟還附送一大兩細的海報,可恨年少時不懂好好珍惜,細的兩張我拿了去攝書,大的那張我貼了在房門,後來搬屋時被老太撕掉了(當時我已在加拿大),激死!

異邦人 - 久保田早紀:唱作女歌手,79年10月1日推出首張細碟《異邦人》,由於歌曲是三洋電機廣告歌,因此一推出便大受歡迎,成為Oricon細碟榜冠軍,銷量高達144萬,是80年全年銷量亞軍。《夢がたり》是久保田早紀首張大碟,當中亦收錄了《異邦人》..

03年的時候ZARD曾夥拍B'z的松本孝弘重新灌錄《異邦人》,編曲rock味極重。細碟最高曾佔據Oricon細碟榜季軍..

9 comments:

Wordy said...

我最喜歡《Don't Wanna Cry》同《A Walk in the Park》,心情麻麻時聽前者很有效的。安室大紅時,其實更喜歡更一 rock 女相川七瀨

安室奈美惠同浜崎步一黑一白,早幾年日本少艾就這兩種「顏色」

Agnes Tse said...

安室奈美惠受小室哲哉"影響"甚大, 小室哲哉後期跌volt, 幸安室奈美惠及時轉型, 不論歌藝或運氣, 好過華原朋美 (小室舊女友) 多多聲.

Fun said...

to wordy,
最喜歡相川七瀨既《戀心》.. 安室同相川都係我初初返香港(97年)既時候狂聽既歌手,時光飛逝!咦,安室其實得31歲咋喎,已經有咁多經歷~

to agnes,
安室直情係由小室哲哉一手捧出黎啦,無小室就無安室~ 華原朋美根本就唔掂啦,唱歌好似俾人“練”住條頸咁..

Agnes Tse said...

聽過故仔, 話成個小室家族都係啪丸, 傳聞華原朋美都係因小室既關係攪到瘋瘋癲癲. 而Sam為保護安室奈美惠, 就遠離小室喎.

安室奈美惠當年hit到爆, 今時今日的確去唔番以前咁有話題. 安室勝在有型更有格, 濱崎步相比之下就好扮野.

Fun said...

其實我覺得華原朋美一出道已經係瘋瘋癲癲咁架啦~

濱崎步同個假公仔(醜嘅)無分別, 啲歌又一式一樣, 仲要唔跳得舞添..

Agnes Tse said...

我仲驚咁樣講會得罪濱崎步d fans添.

Anonymous said...

樓上個"傳聞"都幾搞笑下, haha
當年安室生完之後都有繼續搵小室鋪路, 小室仲幫佢搵埋其他美國音樂人幫佢作歌, 不過都係雷聲大雨點小, 小室個勢又開始衰退, 再加上小室當年同安室個唱片公司關係麻麻, 公司就開始安排安室搵其他人合作。
離開小室頭個兩年都霉霉地, 好多人都唔知仲佢有出碟 (睇返呢排報道, 傳媒仲講到佢當年係俾人雪埋, 無碟出咁) 不過好彩唱片公司一直都keep住幫佢出碟, 佢自己又keep住無退步, 等到依家又紅返, 呢o的就係實力所在!
講開華原朋美, 我以前好鐘意佢。佢初初出道個陣已經係傻吓傻吓咁, 但勝在有個大碼頭同埋幾分姿色, 佢俾小室飛咗之後就真係有濫藥。佢後來有復出過架, 直到今年頭忽然俾人解約, 應該唔會再出來。

Fun said...

安室有一段時間出親show都黑口黑面,唔知點解~ 而家寬容好多!下個星期步姐隻complete精選會上榜,好有機會6連霸,好緊張!

蝦尾 Prawn Tail said...

啊,中森明菜,超喜歡,有齊所有唱片!