7.19.2008

速報!香港小姐08part IV (賽前最後預測)

等到頸都長,08年度香港小姐競選將於今晚舉行啦!由於紅館閉館豪裝,所以今屆港姐將會轉移陣地到香港會議展覽中心舉行,據《東張西望》所報導,今年會以“cyber”為主題,舞台更分成幾部份,可以左右上下移動,聽落相當犀利。

而12位佳麗昨日穿上三點式泳裝會見新聞界,賽前最後一次曝光,各人都似乎狀態大勇,相信今屆將會是近年競爭最激烈的一次。決賽前夕當然唔少得我為大家預測一下各佳麗的得獎機會啦!

1號文柏姿:轉入直路,越見好形勢,身材樣貌都不俗,是本屆其中一隻黑馬。唯一有機會出事可能是問題環節。

5甲指數:60%
3甲指數:50%
冠軍指數:20%


2號倫紫玄:一直都高據網上投票前3名位置,但實戰形勢未許樂觀,始終整體感覺太MK。優點是談吐尚算大方,如能殺入5甲已算超額完成。

5甲指數:40%
3甲指數:20%
冠軍指數:0%


3號張舒雅:狀態實在大勇,樣貌散發著面試實錄時的那份光彩,但負面新聞及倔雷鎚的說話語氣絕對是絆腳石,前幾天又被雜誌拍得跟男生當街啜嘴照,唉。04-07年的季軍都是該屆最高之佳麗,那麼張小姐好大可能會延續這個“傳統”。

5甲指數:85%
3甲指數:80%
冠軍指數:30%


4號高海寧:裸照事件後被傳媒封為大話精,形象跌至谷低,連她自己都好像被打沉了。得了《旅遊大使獎》已不算空手而回,能入也5甲也要還神。

5甲指數:70%
3甲指數:35%
冠軍指數:0%


5號梁倩汶:繼被傳為內定冠軍後,近日又被傳媒煲為大熱,加上低調及四平八穩的表現,成個package都好港姐,今晚絕對有望登上寶座。不過.. 我就唔係好buy佢。

5甲指數:85%
3甲指數:80%
冠軍指數:65%


6號陳倩揚:被一致認為屬陪跑份子,5甲應該無可能不過國際親善小姐就有得諗吓。

5甲指數:10%
3甲指數:5%
冠軍指數:0%


7號梁雅琳:屬於“有啲嘢”佳麗,跟5號同一類,又係大方得體聽教聽話無新聞,總之成個package港姐到暈。最可惜梁小姐只得5呎4吋,若然當選就要出外參賽,到時又會變小矮人啦。

5甲指數:80%
3甲指數:75%
冠軍指數:65%


8號姚婷芝:雖然表現勁落力,但礙於質地有限,所以只能憑鬼影變幻球製造新聞,今晚應該無影多。

5甲指數:25%
3甲指數:10%
冠軍指數:0%


9號謝靜婷:經常名列網上投票前3名。樣貌其實ok但今年質素太好,加上得5呎3吋,今晚可以放心陪跑。

5甲指數:10%
3甲指數:5%
冠軍指數:0%


10號史宛殷:無嘢講..

5甲指數:0%
3甲指數:0%
冠軍指數:0%


11號馬賽:只計樣是今屆5甲人馬,不過整體package又實在爭咁啲。聽聞今晚有很多舞蹈環節,對有舞蹈底子的馬賽來說應該無咩難度。5甲有望,3甲就不甚樂觀。

5甲指數:55%
3甲指數:35%
冠軍指數:5%


12號黃潔婷:今屆我最得之佳麗,但除了在入選初期因“發水Sammi”之名而受注目之外,參選以來一直靜英英,無咩人理。今日報章忽然貼她為黑馬,開心得我。今晚醒定呀,我買重你。

5甲指數:55%
3甲指數:35%
冠軍指數:10%

Fun之終極預測:

冠軍 - 5號搭7號
亞軍 - 5號搭3號
季軍 - 3號搭12號搭1號

最上鏡小姐 - 3號搭11號搭4號搭12號

國際親善小姐 - 5號搭7號搭3號搭6號

左:昨日12位佳麗以泳裝會見新聞界;右:本屆后冠依然由六福珠寶贊助,因此股東之一兼87年冠軍楊寶玲昨日現身綵排並為港姐試帶鑽石后冠

連結:
速報!08香港小姐競選part III
速報!08香港小姐競選part II
速報!08香港小姐競選part I
08港姐面試實錄

7 comments:

Kevin said...

我覺得(9)有D野,似季軍.. 不過又係一開口就醜態盡現.. 而頭一二名都離不開係(7) + (5). 個人希望係梁雅琳拎冠軍la..

但經過上年既教訓...我好驚史小姐會跑出....

Fun said...

9號..個樣ok不過實在太矮,最好唔好選佢!
如果係5同7之爭,我揀5號,起碼高d。個冠軍要去選世姐架,唔想派個小矮人去囉!

我都幾肯定史小姐一定唔得~ god bless~

費仕騰 said...

嘩仲有3個鐘要去喇, 要開始沐浴更衣, 嚴謹程度真係不遜於一班佳麗!!

今年真係好緊張, 我諗就算宣布冠軍時淨返個3位, 都應該"仲"好難估, 實在太competitive!!

MIHO, 你豎定起對耳聽我嗌喇!

naruto said...

順序。。。12,3,4,5

San said...

湊下熱鬧先...對於賽果十分不滿. 冠軍身材係夠高, 但琴晚可以見到佢談吐儀態欠奉. 今朝睇生果, 原來係珠寶太子女...難怪難怪. 另外, 梁雅琳幾有三甲相, 反而...-.-

karsleepy said...

god,great detail.. i like no.5 most

shangri_la said...

Fun said...

6號陳倩揚:被一致認為屬陪跑份子,5甲應該無可能不過國際親善小姐就有得諗吓

Really? Well I was forced to watch the pagent for the first time in years last night because my uncle was visiting. I actually thought Miss Chan will win it all, particularly when the microphone was covering her mouth. But then compared with the photo in your blog, she had a different hairstyle last night...