速報！香港先生08 (賽前預測)

近幾天在MSN不下數(十)次被問到何解《Fun生活》沒有“速報”香港先生喎，哈哈原來大家那麼有興趣！ 好，就速報啦~~

今年《香港先生》的質素算是歷年之冠，起碼樣貌及身材各方面都稱得上養眼，沒有太過“岩蠶”的參賽者，亦無年過四十的uncle。今年賽制應如以往，全女班評判將從少年組及盛年組中各選一位冠軍，然後再由兩組冠軍單打獨鬥，終極優勝者就是《08年香港先生》！

少年組：

左起：1號黃晉業/2號招天佑/3號溫家偉

1號黃晉業：18歲/5呎10吋半 - 海外招募參賽者之一，樣貌幾噢畸，但身材削削哋，有望憑一口竹升廣東話贏得部份女評判歡心。
2號招天佑：20歲/5呎10吋 - 屬中庸“佳麗”，最大單新聞是被爆同志身份，但招小朋友話自己好直架喎.. 咁我喺PP成日見既係邊個呢？
3號溫家偉：21歲/5呎8吋半 - 另一海外招募參賽者，樣子算中上之選，但太過肥大肉厚，上鏡顯得有點笨拙。但ABC一向有種攝人魅力，應該不會在第一round出局。

左起：4號陳冠標/5號趙晨/6號羅天宇

4號陳冠標：20歲/5呎9吋半 - 本屆頭號肌肉男，由面試開始都一味谷胸曬手髀。樣貌啦喎，都係唔掂啦。

5號趙晨：20歲/5呎11吋半 - 雖是最高參賽者，但娘味 + 鄉音 + 飛機場 = 陪跑。

6號羅天宇：20歲/5呎10吋 - 本屆怕羞仔，幾討人愛，我貼他是少年組冠軍。

盛年組：

左起：7號陳世強/8號何君誠/9號呂熙

7號陳世強：23歲/5呎11吋半 - 噢賣吉！個樣想點呀？個嘴想點呀？
8號何君誠：24歲/5呎11吋 - 初登場被冠以奀茄金城武之名，無言！樣貌 身材都無乜，勝在談吐噢畸，有望留到第二round。
9號呂熙：26歲/5呎10吋 - 似張敬軒x陳曉東，在網上投票中節節領先。剛剛被踢爆曾因停牌期間再超速駕駛而被判入拘留所11日。選港生唔同選港姐，這類新聞亦無影響，唔駛驚。

左起：10號黃文迪/11號霍俊毅/12號朱允崇

10號黃文迪：30歲/5呎10吋 - 被認定為長腳蟹呂慧儀男友，是今年風頭躉，勝在有經驗，舞台表現理應較好。黃生應該早幾年參加，家陣個樣好乾，有“老”態。但成熟型一向有市場，那要看看女評判的口味了。咪住，今屆冠軍要出戰《世界先生》，30歲應過年齡上限喎..
11號霍俊毅：24歲/5呎9吋 - 我鍾意呢個呀吓！個樣傻傻呆呆，身材又爆，不過盛年組對手太強，出線有難度。祝君好運！
12號朱允崇：23歲/5呎9吋 - 海外招募參賽者，擺明sell卡哇依，一日到黑矇起對眼。相信決賽夜他一上台全場會立即we we wa wa，絕對有機會威脅10號。

《香港先生》好睇之處除了那一班港生著住泳褲濕晒身在台上周圍走之外，當然是那些平時斯斯文文的女藝員/名模/港姐/名媛，突然淑女也瘋狂的喉擒表演啦，真係笑得死！希望今年依然有伍姑娘撐場啦，無咗佢港生可以唔駛搞！我已經約埋一班朋友拜六一齊睇啦，你呢？

08香港先生泳裝秀

4號陳冠標
5號趙晨
6號羅天宇
7號陳世強
8號何君誠
10號黃文迪
11號霍俊毅
12號朱允崇
左起：12號/7號/11號/9號
12位參賽者出席宣傳活動