港姐08面試實錄

咁又一年，原來話頂唔順都頂咗張嘉兒一年，
阿彌陀佛，就嚟有人頂佢.. 個位！
08年度香港小姐開鑼啦，尋日已經開始面試，
今年入圍既佳麗將會搭郵輪去加勒比海同邁阿密拍外景，
唔知會唔會因為咁吸引多啲靚女參加呢？
不過我都驚係啲女仔見到舊年張小姐都掂，
搞到同佢level既都仆晒去選多啲~~
講返面試先，今日蘋果日報娛樂版有頭條報導，
一如往年佢哋幫人起晒朵，質素好既會俾個靚朵佢，
唔掂既就有咁衰寫到咁衰，個人真係要好刻薄先寫得出架囉！
咪講咁多，一齊睇睇吓今屆既質數先~~

左：o靚版陳法拉 - 有5呎10喎，咁高實搶到鏡。但係我覺得佢個樣似叱咤903總監甘菁菁多啲囉；右：的骰桂綸美，個樣幾sweet，但係的骰喎.. 舊年有個的骰阿嬌得5呎架咋..
左：新鮮海味 - 係有啲似周海媚，有得執既，不過面試喎，著到咁架？；右：靚版Kary - 似Kary就真係唔駛客氣啦，不過好彩係靚版，加上下巴尖尖，可能會in..

左：純情婷婷 - 舊年俾蘋果話係熟女婷婷既王君馨最後拎咗3個獎，呢個唔知點呢？；右：吊帶 茵媺 - 除咗似06冠軍陳茵媺之外，我覺得似埋謎女郎呂慧儀喎~ 不過佢件top好似內衣，扣分..

左：加大碼Race - 佢頭條日報個幅帶住黑昭唔笑既相係似王菲架，個樣可勉強接受，但係好粗線條喎，零腰既！；右：扯褲Pink Lady - 諗唔到佢似邊個就夾硬話佢露粉紅底，激死。呢個我覺得幾好喎，係靚版趙頌茹..

左：高清寶寶 - 頭條日報覺得佢似好勝GiGi。蘋果話佢拍個高清節目《高清補習社》，出過鏡有啲著數既；右：股票經紀 - 尋日佢邊傾電話邊看股票機，仲即時喺電話中替客人落盤買賣。呢個成個欣宜咁款，又著得咁便宜，無機啦掛..
左：發水Sammi - Sammi都係靚女一名，個樣似佢係好事嚟，如果呢位女孩子可以急速瘦面都唔係無機架；右：逼爆香蕉 - 呢位兼職模特兒個胸好勁咁喎，不過港姐一向唔多buy大胸人，再加埋個劉華鼻，應該都係出局多..

奪命香雞腳 - 年年總有呢啲唔知嚟做咩既佳麗，舊年有選美麥玲玲，今年有呢位.. 佢出門口之前可能無印面油，塊面反晒光囉，加上一身九唔搭八既打扮，成為焦點無難度..

左：側面伊人 - 個面型係有啲怪既，不過我覺得佢幾有性格喎，佢最出事反而係套衫囉；右：漢堡女神偷 - 嘩哈哈哈哈哈哈哈哈..

左：迷你陳太 - 呢個真係似喎，見埋副四萬可能仲似多幾成，我覺得佢會係教書Miss嚟；右：呢位小妹妹想點？跑完步無返屋企換衫咁，選港姐呀而家..

最後要補充既係無記會從面試中選出30多個佳麗進行一個合共兩集既《香港小姐面試實錄》錄影，形式就好似玩真人騷咁逐一淘汰，第一集會喺30多個佳麗之中淘汰剩8個，第二集就會安排被淘汰既佳麗進行復活賽，到最後就會選出10至12位佳麗，加埋多倫多同溫哥華約2至3個海外佳 麗，參加喺7月19日香港會展舉行既決賽。