速報！香港小姐11 (賽後點評)
新一屆港姐誕生啦！
今年的賽果相當貼緊民意，
算是由最靚的3位佳麗當選，
絕對是10年難得一見的靚組合，
相信一般觀眾都唔會話她們豬扒啦掛~
好啦好啦，都是咪講咁多，
立即請各位睇睇在下的賽後點評！
製作：
今年是繼04年之後首次回歸電視城舉行決賽，雖然在燈光或視覺效果上都花了不少深思，但電視城始終是電視城，又豈能跟紅館相比？所以難免令人有縮皮感覺。出年是港姐40周年紀念，點都應該返紅館搞大龍鳳啦！
至於在rundown的編排上，今年實在太“上輕下重”，開首幾個環節都趕喉趕命，佳麗連end pose都未擺定，鏡頭已經轉向下一位佳麗。反觀臨尾的兩個擺阿媽上台及佳麗互送禮物的懶煽情環節(其實已經翻用再翻用)就一味死拖長，zzzzz。而宣佈4強就更加是無謂中的無謂，直接由8強宣佈前3名仲緊張啦！
髮型/服裝：
髮型是近年令人睇得最舒服的一次，自自然然，不會騎騎呢呢的有條辨放在前額又或者整篤屎在頭頂。而服裝方面啦喎，基本上Karen Chan一日仲在生，都幾難會有靚衫。今年最敗筆是那套黑色及膝連身裙同中古晚裝，bad taste到呢..
佳麗：
1號甄敏婷 - 整體表現有驚喜，身材/走台/對答都非常ok，連平時最扣分的細路女聲都有所改善。可惜始終本身條件的限制，能殺入8強絕對有所交代。
2號關曉琳 - 本屆悶蛋佳麗首選，正一是多佢一個唔多之流。問答環節表現最令人跌眼鏡。
3號許亦妮 - 我的冠軍人選，論樣貌，她真的拋棄其他對手十九幾條街。第一part晚裝環節以大卷曲髮型登場，靚到嘩嘩聲呀。以許小姐的質素，就算債仔真的登門追數，我都覺得要keep她在3甲。唯一挑剔是身高及身材，修修身的話就good晒啦。
4號林慧倩 - 好似唔似似容祖兒問題仍在，塊面又起晒角咁。幸好口才為她挽回不少分數，否則8強位置也實在容不下她。
5號朱晨麗 - 港姐史上的另一位國產冠軍(上一位應是謝寧)，幸好土味與鄉音都不是利智level。昨晚在頭幾個環節的表現略嫌緊張，條頸索住索住咁，其後才漸入佳境。有報導話朱晨麗曾參加亞姐的網路大賽但落選，其實無問題喎，外國的選美都不知幾多選完再選的佳麗，至緊要有進步。話時話，朱晨麗阿媽其實明知(有機會)上鏡就起碼畫返個嘴同著靚少少啦，現在有點不尊重場合啦我覺得。
6號梁麗翹 - 眼耳口鼻全部有問題，昨晚在電視上看尤其嚴重，好怪囉。不過口齒確實伶俐，就算忘記台詞都能陣腳不亂慢慢兜，勇奪國際親善小姐亦算合理。
7號胡中慧 - 令人大跌眼鏡的佳麗，初入圍時算是標青的一批，但一路下來沒有進步不特止，狀態更是直線向下。昨晚的表現更是乏善可陳，無喱神氣之餘對答又甩甩漏，我以為她會連8強也不入呢。
8號蘇文 - 在頭兩個環節後是評判的Top5之選，但最後又無喱頭8強不入，R頭。不過呢，我又覺得評判做得啱喎，嘻嘻。
9號麥美恩 - 平心而論，就昨晚所見，麥小姐的確比平時靚好多好多，但都只是由唔靚師奶變做靚師奶！臨尾得返5號同9號在台上時，我個心真是勁跳架。
10號李天縱 - 大陸！大陸！大陸！大陸！大陸！大陸！大陸！大陸！大陸！
11號劉思希 - 即是咁，每年總有一個半個佳麗是被髮型或化妝累死的，今年的“幸運兒”是劉思希。整乜要化到佢黑古勒掘咁先？唉.. 陰功！很喜歡劉思希的談吐表現，流暢而unrehearsed，她才是我心目中的國際親善小姐呢。
13號蔡慧欣 - 整晚表現都好像被人用槍指住來選咁，全場分數應該是尾二。
14號朱希敏 - 甫入圍時我的確好buy佢，但後來因講野作作狀狀而打佢入冷宮。但昨晚的表現竟然又奇特地好，有台型有風度，對答又有條不紊唔造作，難怪被受一眾網民所激贊。哎呀，希望朱希敏點都去一個國際賽啦.. 就世姐啦不如。
15號梁蔚翎 - 整乜會醜到咁先？真是一望一驚心呀。其實我覺得TVB負責在海外揀卒的高層有必要出來解釋一下點解梁小姐可以擊敗過千位佳麗入圍架呢？如果唔係那些落選佳麗真是死唔眼閉。
終於有一年的大會評判是選出最貼近民意的賽果，錫晒
最上鏡小姐評判之一的趙式之(右二)在接受訪問時表現得語無倫次，係咪索左… 藥油呀
去年的四位港姐以最佳狀態完成港姐任務。話時話，莊思明個頭又做乜會搞成咁呢
5號朱晨麗兼得由網民投票選出的《最受歡迎大獎》
6號梁麗翹憑平穩的對答表現贏取評判芳心，成功摘下《國際親善小姐》
3號許亦妮大熱勝出最上鏡小姐
3號許亦妮可說是近10年來最省鏡的港姐，如果不是緋聞纏身的話，會唔會是評判冠軍之選呢
來自多倫多的14號朱希敏是今屆亞軍
5號朱晨麗7年前由蘇州來講入讀演藝學院主修芭蕾舞，其後曾到美國進修。來港初期，因經濟能力有限而需租住板間房，是一位刻苦耐勞的學生。難怪在問答環節中的一句“窮得有志氣”會說得那麼氣壯。相信朱晨麗這個故事絕對會成為港姐的另一經典
2011年度香港小姐競選的4位得獎佳麗，各位網友，滿意賽果嗎？
15 comments:
7號真係令人跌眼鏡，浪費左佢既樣貌同身材，如果佢談吐好d絕對係三甲之選
劉思希個妝真係好肉酸，李天縱一講野就以為自己睇緊亞姐
15號...唉，佢醜d定林潔瑜醜d?
三甲同我心水一樣，只係次序唔同
３號五官精緻，風韻過人，但儀態不及５號端方，泳衣一節尤其太過風騷，身材相比下亦略胖，雙腳尤顯粗短，談吐亦只係不過不失，再加重重不利傳聞，得季軍並非太冤枉。１４號相貌其實平平，主力靠身高殺出重圍，談討風度也討好，是出外參賽合適之選。５號芭蕾舞修為的確有助台上表現，現場亦多人為之喝彩，口音只係劉嘉玲程度，可憑觀眾緣搭救，諗真下,其實佢嘅出身都幾代表到今時今日嘅香港！
我覺得１５號雖然唔靚，但其實又唔係醜過其他落選者好多，傻下傻下都幾得意！６號最大問題好似响個咀，但笑起上嚟都有啲媚態，談吐儀態都算得體，可補不足。反而２、４、８、１０都幾三尖八角。１１面大五官小，身材上窄下闊，口材好都救唔返。１３大細眼加五短身材，唔明點解會係大熱，可能俾人捧得過高，自己心虛返而怯場。１７只係霎眼嬌，身材雖高但並非一枝獨秀。１則中上姿色加少少傻氣，叫做俾到少少好感觀眾咁喇。
如果7號既外型加9號既表現,會有d機會威脅到3甲
個show叫左好幾次甚麼甚麼top 5,之後又top 8/4/3,搞到好混亂,都係趕頭趕命咁
你開唔開心,驚唔驚喜? 擒日就勁唔開心,今年支持7-11,最鐘意7號,順便支持3號,佢變發個次勁似李麗珍,11號肯定被TVB整蠱,有乜理由個妝唔系化靚而系整醜,根本系TVB部署好,驚佢口才好得滯威脅到其他內定,所以有咁醜整咁醜, 08陳倩揚臨比賽無厘頭駁發,09自選泳衣有利李姿敏(個年我撐佢, 所以當然贊呢招), 舊年莊思明問答一輪嘴,問佢自己適合做乜化妝品諗半日,事前知道題目唔出其。 因住明年港姐仲加變本加厲, 越來越亞姐。
更正返係變髮, 駁髮。
基本上Karen Chan一日仲在生，都幾難會有靚衫 > 哈哈...
#3 is my favorite for the crown, #11 is very good during the night, a little disappointed that she can't even make the top8. #5 is good, but not good enough to win i think, i was disappointed with her cantonese, way worse than i thought, she really need to take lessons and improve in order to represent hk. #14 did a great job for the final, a surprise in a good way. but i like whitney, she's my mhk11, the most beautiful 2nd runner up in history i think.
5號睇睇0下有啲似上年7號坳底排骨精
１７只係霎眼嬌，身材雖高但並非一枝獨秀。<--７只係霎眼嬌
17號係陳法蓉呀 :)
-通常就算初初選出嚟唔覺得幾靚嘅，經過一年後睇番起嚟都會順眼D。但係2010嗰3位真係好唔掂。反而李雪瑩仲OK。
-上一次有個個咁靚嘅三甲都要去返1999年？
-朱晨麗=Fala Chen #2
-梁麗翹=spoke too much during her interview.
-麥美恩=港版Renee Zellwegger.
-劉思希=I totally agree with Anon @ 9:13 that TVB tried to sabotage her chances with her bland makeup. When I first saw her on TV, I thought someone was trying to f**k up her chances.
-蔡慧欣:點解咁多網民鍾意佢？
-梁蔚翎: See fun's comment on 5 Aug.
I rewatched the show online and no.3 is really stunning, maybe as many said, her figure hurt her chance!
2號勁似藍潔瑛囉……
6號喊到d五官歪晒真係好好笑(對唔住都要講)
希望下年唔好再甘煽情, 好無謂
Post a Comment