11.02.2009

鬧市舌戰港女一分鐘實錄

『港女』一詞,在維基百科中找到以下的解說..

『港女』,一般是指香港女性,但在網上,其含義和用法卻有所不同,多指擁有某些不良特質的香港女人,如自戀、自命不凡、拜金、崇外、漠視他人權利等;甚至可以是一個社會現象,亦可以引申用於擁有不良特質的女士身上。

根據以上解說,『港女』應該是一個貶詞!


上星期五我遇上一位女生,我當然不知道她是否自戀、自命不凡、拜金、崇外、漠視他人權利,但如果『港女』是一個貶詞的話,那她絕對是一名.. 港女! ,

事情是這樣的..

話說上星期五下班回家途中,在下路經銅鑼灣金百利商場 (即崇光百貨對面) 。周末晚,大家應該可以想像到那一帶的景像.. 金百利商場入口滿佈排隊乘升降機到樓上食肆的人,加上東角道近崇光的一段路近日正進行維修工作,所以路人在經過上述地方也難免發生“身體接觸”!就在經過金百利商場的入口之際,我右手邊的身體好像跟一個廿來歲、約5呎4吋,樣貌娟好的女生發生“接觸”。但大家請留意,當時我的右邊膊頭是揹著一個大袋,而右手(呈90度)是勾著袋的揹帶的。這一下“接觸”後,我察覺這位女生跟友人正一邊過馬路一邊回頭怒啤兼一邊呢喃,似是在罵我的樣子.. 於是..

我:(向著她;未提高聲線) 鬧就行返過嚟鬧啦~
女:(開始提高聲調) 咩呀.. 你頭先摸我蘿柚!!
我:(怒火開始燃燒繼而衝上前) 幾時摸你蘿柚呀?
女:頭先呀..
我:小姐,頭先好迫咋喎..
女:(吋tone) 咁你又唔say sorry?摸人又唔認..
我:(再提高聲調) say咩sorry?我根本無掂過你,有都係我個袋啫!你咁矜貴經人揩到就留喺屋企,唔好嚟銅鑼灣啦~
女:(得吋進呎樣並大聲說) 喂.. 摸人蘿柚呀.. 報警呀..
我:(燒到高溫500度並以家傳大聲秘技說) 咁你報警啦,而家即刻報,我企定等你.. 報啦嘛!(街上開始有途人頓足八掛)
女:你驚我唔敢呀?
我:我真係驚你唔敢喎.. 報啦.. (我裝作遞上我的手電).. 報呀~
女:(調低聲調) 黐線!
我:報唔報呀??
女:(開始縮沙並邊行邊說) 黐線.. 都唔知咩人嚟.. 你咪跟住我添啊~
我:走啦.. 快啲返屋企唔好出街啦.. (嬲到手同心都震晒)

女:(繼續回頭邊鬧邊行)

拜五晚,崇光門口,雖有成千上萬途人,但我也不顧得身世向這位稱得上樣貌娟好的港女開火.. 正所謂你唔要面時我也樂意俸陪跟你開拖。麻煩各網友幫眼留意下youtube,看看有沒有好事途人把這段精彩舌戰實錄上載,那我分分鐘紅過趙燕萍喎~

13 comments:

TT said...

拗底果下真係cheap到冇朋友呀!!

查實呢d揩油既指控, 遇著我地呢d會員真係火都黎埋架, 真係唔鬧佢老味上天花板對唔住自己!!

naruto said...

你都好中肯,話佢(樣貌娟好),會唔會係佢個蘿好大咋?

Fun said...

TT,
如果佢堅持報警唔知點..

naruto,
我講事實.. 樣貌係娟好喎~

佢個蘿好大咋 > 無留意佢大定細,不過佢械瘦削形,大極有限度~

best actor said...

四字記之曰﹕佛都有火。
(返香港時真係要小心﹐一個唔留神﹐可能會遇上呢種單細胞生物。)

Wordy said...

前排我都係地鐵俾個唔知講廣東話定鄉下話既阿叔當住成車人鬧我想特登撞跌佢

咁講喇,唔止港女,仲有港叔、港嬸……香港好多神經超過敏既人,佢地唔覺有問題,但就睇到周圍都係問題。撞到呢 d 人,唔係佢地倒霉,而係我地自己倒霉 ~

Agnes艾麗絲謝 said...

好難想像Fun哥你鬧爆對方個樣~

莫講港女, 港男發爛渣我都見過, 仲要係個中坑, 一腳伸向升降機門唔俾上唔俾出, 十分騎呢.

KennyT said...

都真係幾黑仔﹗

Fun said...

vince,
遇著呢d人要emprie strikes back架~ :)

wordy,
而家香港d人真係唔知做咩,係咪食好野太多?

agnes,
咁你最後點?

kenny,
其實佢遇著我,我覺得佢黑d囉 :)

wai said...

如果條港女報警,我幫你做證你係鍾意男人!
哈哈!

CH Mak said...

总之好多人都有压力,未解决...

Agnes艾麗絲謝 said...

我公司係十樓, 七樓有間公司兼做慈善, 提供食物俾一d失業或年邁人士.

果次搭lift返公司, 咁岩我有一個男同事, 一個女同事同lift, 個中坑按制後發現男同事係佢後面, 佢望左足足半分鐘以上有多. 之後停係七樓, 佢就一腳伸向lift門, 怒啤男同事, 開始理論, 話佢鬼祟企係人後面. 男同事亦不甘示弱, 回敬對方未訓醒. 七樓既人就企係出面傻笑.

女同事想好言相勸, 我本來都想窒下對方阻住地球轉, 但怕佢唔俾我走, 萬一佢兇我點算呀? 最後我同個女同事衝出lift走上十樓, 男同事就call同事落去救駕...

事後我問番男同事點樣收科, 對方答: "死窮鬼, 乞兒黎之嘛!"

囧.....

黑柴 said...

佢都係想保護自己啫,可能你個”袋”真係碰到佢個”蘿”呢!若佢堅持報警都應該幾麻煩,佢仲生得幾靚女,差人實信佢啦!

但佢見你咁靚仔應該惺惺相惜架!

13elle said...

我想像到當時ge情景..