3.03.2009

朋友

某夜某網友問:你又話數吓一年要去幾多個生日飯局?

昨晚臨找周公前半認真的統計過,原來我一年裡大概會出席約45個大大小小的生日飯局!如果以平均每次3舊水消費計算的話,一年便會用上HK$13,500去這些飯局。

一年去45個生日飯局對一般喱民來說應該相當匪夷所思,有些人更覺得是痴X線架咩!

老實說,這45個人不是阿貓阿狗來,全都是“真正朋友”,即是會經常或間唔中傾電話/sms/食飯/睇戲/蒲club/旅行那種,絕對不是hi-bye點頭朋友!

我必須承認在下的人際網絡是頗大的,大包圍各行各業,高上中下層人士,而從我在銅鑼灣閒閒的走一圈就已經要打數個招呼已可見一班。

正所謂朝中有人好辦事,多年來的確曾得過不少著數。小則莫過於買演唱會飛可以有好位、買衫有折頭、等位食飯可以跳隊;大則有人連好工都介紹過我打。

表面上看似是一個優勢,但萬料不到暗瓦底,這竟然是一個認識伴侶的負累!

你咪笑呀,這是事實!

以下是我跟某友人曾幾何時的對話..
我:喂,點解我識唔到人架呢?
友:你唔係識唔到,係識晒..
我:有無病呀識晒..
友:咁識得太多囉.. 啲人見你識咁多人,可能會驚..
我:咁都驚先好~
友:係呀,驚你咁叉多朋友唔會全心拍拖囉..
我:兩樣嘢喎..
友:一係又覺得你咁多朋友,一定好high profile,同埋會label咗你同某啲friend係同一類人囉..
我:點先.. 當初我返嚟香港,你係有份叫我去識多啲朋友,擴闊社會圈子就易啲識人嗰個喎,而家又話識得太多人,你講晒啦!
友:無辦法,呢啲的確係某些人對你既睇法..

對於友人的“指控”,我有些回應..
一: 無拖拍自然要找朋友架啦,同全心唔全心是無關的。而少朋友的就一定代表他會一條心啦咩?
二:請解說一下識得多人同high profile有甚麼直接關係?
三:你是跟我拍拖,不是跟我的朋友啊!
四:拖都未拍就想到咁遠,駛唔駛先?

是否人總愛胡思亂想的呢?如果換著我,我會覺得一個人擁有那麼大的人際網絡,他必然是有點長處,例如人緣好、性格隨和、做事有擔帶等等,那麼跟這個人一起應該唔會衰得去邊!

喂,其實那些人是否害怕要陪我出席45個生日飯局咋?

11 comments:

best actor said...

老實講﹐好少人有你人緣o甘好﹐o甘會關心人 (如幫朋友整餅)。不過呢﹐人o地 (即八公之流﹐如我) 可能會問﹐你有o甘多質素高o既朋友點解會無咩發展o既可能呢﹖係唔合眼緣﹐唔合性格﹐定係你一朝遭蛇咬十年怕井繩呢﹖我覺得要遇上一個"後選佳麗"固然係問題所在﹐點樣o係剛剛開始o既時候﹐有比較私人o既空間發展亦有一定o既難度。唔係話玩地下情﹐但剛剛開始o既時候屬於彼此認識階段﹐唔包生仔﹐無可能馬上見光﹐但你識o甘多人俾人見到﹐就一定有蠱仔。我係相信感情開始o既時候最好唔好同人講﹐到o左有一定基礎先慢慢同手帕交單獨會面﹐漸漸融入主流社會。至於有無人肯陪你出席45個生日會﹖o甘就要睇下你個拍拿係唔係extrovert同有幾錫你啦。有時愛屋及烏係package deal﹐各要付出。good luck la!

不是公主 said...

我一年需要出值0既飯局,計埋自己生日
係5隻手拍數得晒~ (基本上3隻都得嫁啦)

KennyT said...

可能有d人想識你﹐但又發現佢曾經同你邊個邊個朋友keep過wor﹐然後又發現可能又你邊個邊個朋友個邊個又同佢keep過wor﹐所以可能有時想識你個d人卻步囉。連佢自己可能都會(表面上)覺得亂左D﹐又或者驚旁人覺得佢亂左d。呢個circle本身就係好細﹐仲要差唔多D人都俾你識晒添﹐點算丫你話喇﹗

Fun, 可能你既target要擴展到外地﹐如你唔“灰得”﹐亞洲人可望向澳門/新加坡/國內/台灣/日韓等地區。hahahaha

CH Mak said...

Sigh... the person would go broke just to attend 45 bday parties with you all year long....

hahahaha

Don't worry. I believe in u. :)

Wordy said...

45 個,比我想像中少 5 到 10 個

我從來冇入過世,唔識講規矩,地下情、circle 一概唔懂。當你終於找到 love,那位人兄又可以同你去到 45 個飯局(另加其他大小節慶活動)。這樣的一個人,自己都可能有唔少局係身。你又可以同對方去到(或者頂到)幾多個?

事情總有兩面睇,你可能要考慮調節一下

KennyT said...

仲有﹐有d朋友仔超害羞﹐你咁多朋友﹐想識你個d朋友仔可能驚被你的朋友們評頭品足(大佬﹐真係可能有d靚仔如金城務都怕怕啦)﹐你知啦member其中一特性就係鍾意評頭品足o架嘛﹗

TT said...

原來你所有朋友對你冇拖拍既comment都大致上係一樣喎!

爛 铜 said...

可唔可以出本飯局攻略 ?

Anthony ng said...

妖,又唔見你賀我生日飯局

Leo said...

45/52? :O!!!

阿寶 Francis said...

45.......平均每一至兩星期就 party 啦喎!!! 好忙呀!!!