8.12.2008

速報!澳門小姐08partI

選美停不了!

新鮮滾熱辣 - 08年澳門小姐競選開鑼!

澳門近年發展急速,大型酒店紛紛插旗搶灘,旅遊業一片興旺。為進一步推動當地旅遊業,澳門旅遊局連同多個機構一同協力復辦澳門小姐競選。《08年澳門小姐競選》將於9月7日假座威尼斯人度假村酒店『金光綜藝館』舉行,獲選冠軍的佳麗將代表澳門出戰11月份同樣在澳門舉行的《國際小姐》及明年1月份在香港舉行的《國際中華小姐》。

昨日10位澳門小姐候選佳麗首次會晤新聞界,左起:陳小玉、區結儀、許鄒遲、梁妙娜、關安娜、陳雅雯、伍家怡、呂蓉茵、屈佩盈及呂倩嫗
5號關安娜是中葡混血兒,懂4國語言,是傳媒眼中的大熱門
08年度香港小姐前3名亦有出席記者會,左起:冠軍 - 張舒雅、亞軍 - 陳倩揚、季軍 - 馬賽
06年香港小姐季軍呂慧儀是澳門小姐面試評判之一

追溯歷史,第一屆澳門小姐是由澳門娛樂舉辦,時為72年,可惜一屆之後便壽終正寢。到了85年,澳門電視台接手主理,得獎佳麗更有機會參加國際性選美活動,例如:世界小姐、亞太小姐及國際華裔小姐。85至97年間,一共出現了13位冠軍人馬,末世冠軍為羅慧雲,相信她應是選美史上任期最長的佳麗,一做11年,辛苦晒。澳門小姐,對於一般香港觀眾來說應該十分陌生,但當中有些名字你或許會有些印象的呢!

86年:曾小燕 - 是86年3料得主,一人包辦亞軍、最上鏡小姐及青春小姐,風頭甚勁。87年來港參加港姐,可惜強敵林立,最終12名不入。88年再戰亞洲小姐獲得亞軍,可惜當選翌日即被刊登後台露毛照,從此被稱“西米露”。其後加入電影圈拍攝多部電影,當中最受注目的是91年與巨乳女優葉子媚合演的《聊齋艷譚續集五通神》,影片中曾小燕更有多場大膽裸露鏡頭。最後一部電影為00年的《網上怪談 》,其後下嫁一名商人並育有一子,但不久便離婚。曾小燕現定居澳門。

87年:呂靜紅 - 87年亞軍,參選前是無線5線女藝員,最為人熟悉的作品是在《楚留香之蝙蝠傳奇》中飾演楚留香(苗僑偉飾)的紅顏知己蘇蓉蓉。

89/93/95/96年:畢美娜/畢嘉麗/畢嘉寶/畢美琪- 一門四嬌娃,四姊妹分別在7年內先後登上冠軍寶座,這項紀錄亦早被列入健力士世界紀錄大全。大家姐畢美娜於89年參加《國際華裔小姐》競選獲得季軍(同屆亞軍為陳法蓉),其後被王晶看中參與電影《靚足一百分》演出。但一套電影之後便決定重過平淡生活,結婚生子。可惜其中一名兒子在一次意外中去世。畢氏四姊妹曾開設澳門小姐餐廳,但現已結業。

89年:李莉莉 - 88年曾以李麗嫺之名參選亞姐但落敗,89年化名李莉莉參加澳門小姐獲得季軍。當被記者問到是否跟李麗嫺是同一人的時候竟擘大眼講大話,硬說李麗嫺其家姐,吹佢唔漲。後來以超騎呢形象殺入娛樂圈,其面皮幾呎厚的表現為她贏得“阿伯殺手”雅號。94年為美的冷氣拍攝電視廣告,主題曲《我要你每夜陪住我》成為西歌經典。近年轉戰大陸市場,去年的活動包括推出全新國語專輯《白髮為你留》及出席四十一健健的生日會

93年:陳敬密 - 93年季軍,曾來港角逐國際華裔小姐名銜。近年改名為陳佩嘉來港進軍模特兒界,雖無乜job接但仍以名模自居。據聞陳小姐在名模界牙齒印甚多,早前曾傳出與另一名模陳嘉容不咬弦。現時的男友為過氣無線男藝員彭文堅。

96年:李菲 - 96年亞軍,來自國內,參選前是一名武術運動員,曾代表澳門參加亞運會。卸任後返回國內拍攝電視劇。

86年澳門小姐亞軍、最上鏡小姐及青春小姐 - 曾小燕
87年澳門小姐亞軍 - 呂靜紅
89年澳門小姐冠軍 - 畢美娜
93年澳門小姐季軍 - 陳敬密 (又名陳佩嘉)
96年澳門小姐冠軍 - 畢美琪
96年澳門小姐亞軍 - 李菲

18 comments:

Wordy said...

睇到題目就諗你會唔會講畢氏姊妹同澳姐歷史

記得有一屆決賽在回力球場搞,亞視現場轉播一些片段,好多港星去演了一場水準極低的歌舞,冠軍好像叫「白海倫」什麼的

不知道呂靜紅原來是澳門小姐出身呢

「出席四十一健健的生日會」都係多謝你地俾面啫

想問「超級男新星」彭文堅而家撈乜?

Fun said...

講澳門小姐不能不提畢家4嬌娃啦!

你講個年係88年,競選過程斬件響EYT播出,司儀係曾志偉同阿叻。至於個場歌舞好似係有莫少聰同張國強.. 個場應該係綜藝館黎喎~

呂靜紅係做完無線先去選澳姐架!

唔知彭文堅做緊咩喎,早幾年成日響GYM見到佢~ 話時話佢都係我學弟喎(聖祖)!

80年代真係好開心,明周連澳姐都有大篇幅報導架!

Wordy said...

88 年架拿?唔係專家,記憶存取錯亂,哈哈 ~

Fun said...

但係你都記得佢叫白海倫喎.. 我諗香港唔多過廿個人記得呀~~ 所以你都係.. 勁!!!!!

Anonymous said...

細個係 eyt 時段睇過幾屆, 但印象唔深, 亦冇去記d 佳麗名, 睇完就算!
但仲記得果d 中葡混血兒都醜得嚇人!!

??? said...

嘩, 72 年已經搞過一屆? 咪仲早過TVB 搞港姐?!

我記得85年澳門小姐係好有 noise 架, 明周有大量 coverage, 當年一睇完又港姐無耐, 就論到健姐同亞姐, 又有澳姐, 之後又到亞太小姐, 真係忙足大半年!!!

亞何超話有人叫過佢試下去選澳門小姐, 但佢覺得以佢自己個身份, 選到既話, 會俾人話係做馬, 選唔到, 又會比一般女仔落選瘀 100倍, 所以就唔鬼去.

Ogake said...

勁呀~ 連澳門小姐你都知咁多~~
你都真係要入選埋健力士先得啦!!
(四姐妹那段應為 陳"法"蓉)

TT said...

hahaha 陳"發"蓉... Monica型格指數勁跌1萬點!!

話時話畢嘉寶真係好鬼鄧麗文feel, 佢華姐時既勁MK表演真係令我嚇一跳!

chi said...

當年我採訪過澳門一間葡國菜館,叫做澳姐餐廳,好似在仔,由畢家其中一員經營,裡面擺放了畢小姐的獎座后冠等,很有特色,唔知而家摺左未呢?

chi said...

原來仲未摺,詳情請看 :
http://www.macautvl.com/eating/missmacau.html

??? said...

呢兩條 link 仲有更多資料 (不過根據第2條 link, 間野又的確係執左架啦喎):
http://travel.21cn.com/mytrip/news/2007/07/11/3343666.shtml

http://travel.21cn.com/mytrip/news/2007/07/11/3343666.shtml

??? said...

Sorry, 第2條 link 應該係: http://hm.people.com.cn/BIG5/83174/6039427.html

Agnes Tse said...

畢家四姊妹的確唔提唔得. 記得細妹畢美琪囉冠軍時, 同屆有參賽者抗議, 話賽果做馬... 我印象中, 四姐妹中大家姐最靚, 當時佢出番黎撐細妹, 留左長頭髮.

??? said...

畢美琪囉冠軍既時候勁肥, 個狀態確係嘛嘛, 而且佢3個家姐已經贏過, 佢又繼續贏, 好難唔俾人批評既, 不過佢選華裔小姐既時候就好左好多.

其實個 d 話佢既落選佳麗, 自己又係乜野 quality 先? 以我所知, 當年 d 澳門小姐參選佳麗, 真係可以好嚇人架, 分分鐘搵個史宛殷出黎都好過佢地.

Fun said...

畢嘉寶加冕俾畢美琪喎,唔俾人噓先奇啦~ 不過我記得嗰年除咗畢美琪之外, 其他佳麗都好嚇人架~

四姐妹中畢美娜最靚啦, 不過佢有啲似肥媽架實情~

Leo said...

噢原來我地見過面架喎

畢美娜唔錯,啲妹就差啲喇,唔夠阿莉莉姐咁標青,哈哈

我個卜加密咗,冇你電郵,發唔到邀請帖過你呀

新工好玩嗎?點解唔寫下?

Fun said...

係? 在哪?

莉莉姐直情係澳姐中的澳姐..

我的E貓是:miho0311@豬貓.com

新工ok啦, 好忙~ 穩定啲先寫啦 ^_^

Leo said...

個伊貓好得意 即刻發帖先