4.06.2010

熱戲推介 - 志明與春嬌


07年起,香港政府實施室內禁煙,我真是舉腳反反反反反反反反對!這個政府在政策推行前,大肆吹噓曾派員到日本多個地方考察,以証明香港也同樣能進行相關措施!但大佬呀,人家條明治通闊過百德新街9倍架,煙民呼出的煙起碼散得容易很多啦。加上日本人真是極守規舉的,打邊爐就打邊爐,不會揸住支煙癩癩閒四周圍行。我們的香港人啦喎,好有手尾架嘛,大把煙民打完邊爐都不會(完全)質熄支煙,搞到(以銅鑼灣為例) 10個垃圾桶有9個都是燒著的,周街都一陣陣白煙,勁討厭!另外,有些煙民就更加喜歡一路行一路抽,跟隨其後的路人分分鐘硬食其二手煙,這樣同強姦人家個鼻沒有分別囉,有時真是慶到想殺人~ 唉.. 政府呀政府呀.. 好心做壞事呀,曉唔曉呀?

好啦,發完一輪牢騷,要入返正題。復活節最後一天假期,我跑了去看朝早11點場的《志明與春嬌》!

首先我要申報利益,其實我一向都好like余文樂的,真架喎.. 記得當年他初入樂壇,唱片公司第一次帶他來行台,那副想笑與唔笑之間的cool樣,加上精細的五官,令我留下很深的印象。後來在樂壇發展未如理想,百份百轉戰電影圈,多年來拍過多套(不賣座佔多)電影,但我看過的不出4套,那何解這趟又恨睇成咁呢? 莫非因為彭浩翔?無啦掛,他之前的作品都是看VCD的,ok咁囉~ 因為楊千嬅?um.. 我是曾經很愛丁太,但只限於她的歌手身份咋喎..

那麼.. 應該是因為故事橋段加上超好的口碑吧!

看《志明與春嬌》看得投入是因為故事真的從生活出發,還是一個徹徹底底關於香港的故事:志明與春嬌,一個廣告公司職員,一個化妝小姐,因為香港實施室內全面禁煙,所以在後巷放煙break的時候撻著了。

彭浩翔描寫時下年青人的心態向來不俗,尤其是少女心事。今勻更得《烈日當空》的導演麥曦茵一同撰寫劇本,成功地將大都會年輕一代對愛情曖曖昧昧,似有還無的情緒,展示得淋漓盡致。戲中的對百也夠精警,小情小趣,看得過癮到要大拍手掌。特別是志明與春嬌的那些sms,實在沒有犯到一般港產片的毛病:唔講人話!看過包你會在心裡爆一句:我真係有咁寫sms架喎。

至於演員的表現,楊千嬅比以往的演出流暢,演活了一個被感情所困,患得患失的典型香港中女。唯一要挑骨頭的是作為一個煙剷,怎可能還是打煙炮架?離譜~ 余文樂啦喎,實在是神采飛揚,每一個表情,每一個動作都是自然無比,渾身是戲。睇完真係唔like余文樂下嘛?!

Side cast方面也有幾位值得一讚,第一位是演舞台出身的Brenda Leung,她那個“張相似公主,真人似蕃薯”的中女June角色,真的笑到氣咳呀。第二位是飾演酒樓知客的前亞姐繆非臨,又是另一入型入格之選。最後一位是05年港姐亞軍陸詩韻,估不到她也演得自然隨意,那段仿紀錄式訪問,很不像新人的演出。

上面曾說過戲裡的對白非常精警,漏兩句過大家呢..

志明與春嬌到時鐘酒店爆房,春嬌突然哮喘發作。病發後志明在床上擁著春嬌說:有啲嘢唔係要一晚做哂嘅,我哋又唔係趕時間.. (嘩.. 唔係唔冧死呀~)

春嬌對著志明說:其實你唔帶眼鏡靚啲喎.. 志明答:戴都靚喎.. (嘩.. 唔係唔cute呀~)

喂,真心覺得《志明與春嬌》好好睇喎,你會唔會睇啫,就落架啦!?

Btw,我覺得《志明與春嬌》個戲名其實有少少趕客.. 改為《n55!W !》會好一些嗎?

電影預告片

12 comments:

Ocean said...

同意, 呢套戲實在值得支持, 最驚喜係"最後的玫瑰" 番到屋企即刻摷番Jenny姐姐隻碟聽!

Wordy said...

唯一一次見余生係近十年前佢拍完兩輯 Y2K 後同其他演員入電視城,果時佢算前輩,好正經

Jessica said...

I think I will go to check it out after reading your review

:)

Anonymous said...

原來電影已公映了兩星期..

只怪宣傳太少吧?

TT said...

我又唔係好認同你咁講喎, 煙民唔自律, 唔可以怪政府卦。

阿ta said...

AGREE 千華呢套真係okay返dd!

Fun said...

TT,
當然煙民唔自律係一件事,但政府根本低估咗(or莫視)香港大部份環境都唔適合室外吸煙都係要鬧..

shangri_la said...
This comment has been removed by the author.
Leo said...

彭導嘅戲真係一齣都未入過戲院睇,亦從未主動為過丁太入場。今次因為余生俾人啲咗去睇,係好多小驚喜嘅,對白寫得好,演嘅亦自然,值個B咁喇。

Fun said...

係好多小驚喜嘅,對白寫得好,演嘅亦自然 > 賺得好勉強囉 (Handlerbaby腔)

Anonymous said...

I am totally in love with the movie. Highly recommend!

perko said...

請不要把甚麼責任都推給烟民。垃圾筒著火是因為有人隨手將紙巾垃圾丟進烟灰缸引起的!香烟 烟蒂 濾嘴 都不是易燃物。你有看過燒得火光紅紅的烟嗎?