MHK09 Blogger’s Choice (結果公佈)

簫亮：2009年度香港小姐競選Blogger’s Choice總決賽，現在開始..

簫亮：大會司儀，何守信.. 鍾景輝..

何：各位嘉賓，各位網友，由Fun生活主辦，2009年度香港小姐競選Blogger’s Choice總決賽，而家正式開始！

鍾：雖然今年係第一次舉行呢個選舉，但經已得到網民嘅熱烈支持，報名想成為評判嘅人數可以話係出乎意料之外咁勇躍..

何：咁就立即為大家介紹一下5位大會評判同6位網上評判.. 第一位係鍾意還鍾意，還是最鍾意廣東話選美嘅費事騰..

鍾：第二位係由懂事開始認定，大眼就係等於靚嘅Sergio..

何：第三位係曾經擁有個人選美網頁，曾經出席05年度環球小姐競選嘅RY..

鍾：第四位係由78年開始就睇港姐同認為一路食杯麵一路睇選美就最開心嘅無累旅子..

何：最後一位大會評判係堅持莫可欣當選港姐冠軍係好合理嘅Fun..

鍾：而另外6位喺網上招募嘅評判就包括有naruto、阿Law、Natalie、robocon、Kevin同埋Gigi嘅.. 有勞咁多位評判！

何：11位評判根據10位佳麗嘅樣貌、身段、談吐、台型/儀態4個項目評分，
每個項目最高分數係99分，而最低就係55分..

鍾：每個評分項目中最高同最低嘅分數會被撇除，餘下分數嘅總平均分就係嗰一個項目嘅分數啦..

何：另外大會仲設有5個單項獎，分別係最上鏡小姐、國際親善小姐、最佳泳裝演繹獎、最具超模風采大獎同埋事前事後變臉大獎，呢5個獎項係由11位評判以一人一票方式投選出嚟嘅..

鍾：相信各位網友都等得好心急架啦，結果其實一早已經喺我手上，第一個要公佈嘅獎項係最上鏡小姐.. 何B，不如你嚟先呢..

何：2009年度香港小姐競選Blogger’s Choice最上鏡小姐係.. Miss Photogenic is.. 9號袁嘉敏.. 9號袁嘉敏一共係獲得6票嘅..


鍾：好啦，跟住要宣佈嘅係國際親善小姐.. 2009年度香港小姐競選Blogger’s Choice國際親善小姐係.. Miss International Goodwill is.. 嘩係雙冠軍喎，4號劉倩婷同8號熊穎詩，佢哋兩個都係分別獲得3票嘅..

何：第三個獎項係最佳泳裝演繹獎，究竟邊個著泳裝著得最靚呢？2009年度香港小姐競選Blogger’s Choice最佳泳裝演繹獎係.. The Best in Swimsuit is.. 8號熊穎詩，佢得到嘅票數係6票..


鍾：現場一片熱烈嘅歡呼聲，我哋唔好俾佢停，接住要頒發嘅係最具超模風采大獎.. 2009年度香港小姐競選Blogger’s Choice最具超模風采大獎.. The Potential Supermodel Award is.. 8號熊穎詩，佢得到嘅票數係7票..

何：嚟到最後嘅事前事後變臉大獎，呢個獎係頒俾最成功改頭換面嘅佳麗.. 2009年度香港小姐競選Blogger’s Choice前事後變臉大獎係.. Before & After Awward is.. 8號熊穎詩，佢得到嘅票數係9票..

鍾：真係越嚟越緊張.. 跟住我哋要宣佈3甲架啦喎..

何：King sir，不如我哋特別啲，一口氣公佈晒10位佳麗嘅分數，由第10位開始呢..

鍾：一於咁話.. 等我講先啦就.. 第10名係.. 1號曾曦寧，得分係67.36分..

何：第9名係.. 2號林潔瑜，得分係73.3分..

鍾：第8名係.. 6號黃嘉麗，得分係73.6分..

何：第7名係.. 3號鄭寶源，得分係74.1分..

鍾：第6名係.. 5號馬詠恩，得分係75.9分..

何：第5名係.. 7號鍾溥敏 Mandy，得分係76.4分..

鍾：第4名係.. 10號李姿敏，得分係77.4分..

何：嘩前三甲嘅位置，2009年度香港小姐競選Blogger’s Choice季軍係.. the second runner up is.. 9號袁嘉敏.. no9. Candy Yuen.. 佢嘅得分係80.9分..


鍾：亞軍啦喎，淨返兩個喺台上面，你哋嗌下啦.. 2009年度香港小姐競選Blogger’s Choice亞軍係.. the first runner up is..4號劉倩婷.. no4. Sandy Lau.. 佢嘅得分係82.5分..

何：亦即係話2009年度香港小姐競選Blogger’s Choice冠軍係8號熊穎詩，the winner is no.8 Mizuni Hung，佢嘅得分係84.6分..恭喜熊小姐成為第一屆嘅2009年度香港小姐競選Blogger’s Choice冠軍！！！而家我哋有請熊穎詩小姐繞場一周接受祝賀！


鍾：我哋嘅競選亦都到此結束，多謝大家收睇，出年見.. 拜拜！