5.23.2008

回憶總是Fun的 - 選美篇 (環球小姐競選一九八八)


當年今日,八八年五月廿三日,第三十七屆環球小姐競選於台灣舉行,結果由芳齡廿歲的泰國小姐艷壓群芳奪得后冠,韓國小姐屈居亞軍、季軍及殿軍分別是墨西哥及日本小姐,而香港小姐楊寶玲則獲得第五名,成為無線接手舉辦港姐以來成績最彪炳的佳麗。

八七年港姐被譽為史上質素最強橫的其中一屆,亞軍李美鳳、季軍林顈嫺,甚至退選的邱淑貞都是觀眾心目中的大美人,楊寶玲能脫穎而出力壓群雌成為冠軍即惹來不少批評,說她師奶說她造作的大有人在。誰料楊小姐竟成為最架勢港姐,屢次在國際選美場上耀武揚威,繼於八七年世界小姐中獲選亞洲皇后兼進入最後十二強後,八八年環姐中更再下一城進身五強,難怪連香港報章在決賽翌日都以“零的突破”作為大標題。雖然楊寶玲為香港選美史寫下光輝的一頁,但仍有不少普羅市民質疑她的成就,說她撞彩死好命。不過作為觀看了選美超過三十年的我則認為,楊小姐的戰績絕對是在天時地利人和三合一情況下造就出來的。

先說天時,環姐從八七年起將選舉時間推前,由往常的七月改為五月,當時有部份參賽國家/地區因未能作出配合因而被迫暫停派出佳麗出賽,所以八七及八八年的參賽人數亦比較少,相對地勝出的機會率就自然提高了。再看看前五名佳麗,泰國、韓國、日本加香港,有五份四是亞洲區佳麗,簡直是罕見至極,賽果至今仍是選美粉絲的談論話題。這樣出人意表的結局,唯一解釋是該年評判對黃種面孔有特別偏愛囉。

關於地利,主辦國為台灣,話晒亞洲地方,東南亞區佳麗成為焦點實屬正常,加上楊寶玲在當選港姐後不久便拍了成龍的『飛龍猛將』,電影也曾在台灣公映,當地觀眾對她倒有點印象,又加了分。

至於人和,楊寶玲是否靚女一名的確見仁見智,不過她絕對不醜,還蠻有東方美。體態方面,身高五呎七吋,是國際選美的標準高度,置身高頭大碼的佳麗當中也不會被淹沒。另外因曾當模特兒關係,貓步擺甫士技巧挺熟練,舉止優雅得來又懂搶鏡,每每出席公開場合都成為記者目標。另外談吐這一環亦是其強項,女拔萃出身兼去過英國浸鹹水,英語當然勒勒聲,語氣又夠斯文大方,掂晒!

綜合以上三點,楊寶玲確是一個合格有餘的pageant queen呀!你依然覺得不夠說服力?um.. 那麼要去一去片,一齊睇睇環姐八八競選過程啦!

開場/民族服裝/自我介紹 - 環姐八八的整個production實在令人拍爛手掌,舞台設計千變萬化,換景之速度快到嚇親。


宣佈十名 - 經過問題、泳裝及晚裝初賽後,評判從六十六位佳麗中挑選十位進入準決賽,賽前大熱美國小姐及多明尼加小姐以第一及第二名進級,韓國及泰國小姐排名第三、四,楊寶玲則位列第六。東道主台灣小姐意外地被拼出十名以外。入選的十位佳麗會再次透過問答、泳裝及晚裝三個環節以爭取進入五強。


問答環節一 (香港至日本) - 楊寶玲在對答中表示如果有機會的話會訪問其偶像愛迪梅霏。最後楊寶玲的分數排在第六。

Online Videos by Veoh.com

問答環節二 (泰國至委內瑞拉) - 在LA長大的泰國小姐以超級流利英語表達其愛國情緒,她希望能幫助泰國的貧困兒童。她的眼濕濕表現果然獲得評判歡心,以超高分數排第一。而天生一副娃娃臉的韓國小姐雖要翻譯協助,但分數也不弱,最後排第二。

Online Videos by Veoh.com

泳裝環節 - 十位佳麗以火紅色泳裝亮相,配合舞蹈員以羽扇營造海浪的效果,畫面很吸引。於初賽泳裝環節得到最高分的美國小姐竟然大脫腳,分數排第八,泰國、韓國、墨西哥、多明尼加及日本為頭五位,楊寶玲排第七。


晚裝環節 - 佈景以水晶宮為主題,十位佳麗在little sister陪伴下以自選晚裝登場。楊寶玲以一襲銅色(copper)晚裝出戰,我記得這套晚裝是她親自到贊助商那裡挑選的,結果不負眾望,分數突破九分排第四。泰國小姐以一身白色高貴晚裝力壓其餘九位佳麗,連續三個項目都排頭位。韓國小姐則緊隨其後,繼續排在第二位。


宣佈五名/評判最後投票 - 經過三個環節後,進入最後五強的分別為墨西哥、香港、韓國、日本及泰國。楊寶玲要不然在晚裝環節攝了上來,她肯定五強不入,真的險過剃頭呀。五位佳麗要接受評判的最後投票,她們需站到台中央然後評判會於電腦輸入各人名次,經統計後獲得“第一”票數最多之佳麗自然就是新一屆環球小姐。從現場觀眾反應所見,泰國及日本小姐獲得最熱烈的歡呼聲。


加冕 - 最緊張的時刻終於來臨,結果就在司儀手上,第五名.. 香港小姐、第四名日本小姐、季軍墨西哥小姐。台上只剩下韓國及泰國小姐,一冠一亞,如冠軍未能履行及完成任務,將會由亞軍頂上.. 亞軍是韓國小姐,八八年度環球小姐是泰國小姐!泰國小姐龐蝶(譯名)芳齡二十歲,身高五呎八吋,是一位大學生,她更是泰國繼六五年後第二位登上環姐寶座的泰國美人。(註:泰國小姐亦同時奪得最佳民族服裝獎,而其他獎項包括最上鏡小姐為英國小姐、關島小姐則贏得友誼小姐)


左:楊寶玲跟其他亞洲區佳麗以泳裝亮相;右:楊寶玲企圖以勁拗腰甫士搶風頭
十強佳麗:左起 - 香港/多明尼加/墨西哥/美國/日本/委內瑞拉/挪威/哥倫比亞/韓國/泰國
最後五強:左起 - 墨西哥/韓國/泰國/日本/香港
左:前五強佳麗於加冕後合照;右:五強佳麗與她們的“little sister

33 comments:

Wordy said...

呢一屆係印象幾深刻,為遷就美國 prime time 在白天舉行。台灣小姐不算太標致吧?89 年香港搞世姐,亞視播,反而冇(得)睇 ~

日本小姐好像姓坂口,給我一點慌失失的感覺(跟今屆得環姐的同鄉的開放完全兩回事呢)。也喜歡墨西哥小姐的笑容,很漂亮。

對 1979 年也有印象,因為塌台,上了六點半新聞,記者訪問鄭文雅,得冠軍的是委內瑞拉,從此知道這國家的女生精於選美。

ps 公司突然 block 你管,很不方便

Fun said...

係呀,每逢主辦國係亞洲國家,環姐都係朝早舉行架,所以88年既環姐其實係香港時間24號朝誕生.. 諗真d朝早舉行真係苦左一班佳麗,凌晨3點要起身準備呀~ 台灣小姐的確唔係好掂,不過主辦國嘛,有機會入下(應該)。89年世姐亞視有轉播架喎!

日本小姐叫坂口美津穗,表現其實麻麻啦,不過勝在講得幾嘴英文。哈哈.. 而家既日本環球小姐大會由一個法國婆揸fit,響佢訓練低下d佳麗全部係開放agressive型架。88年既墨西哥小姐都係當年佢地國家既零的突破黎架,響佢之前只得54年既時候得過第4架咋。

係呀,79年塌台好大件事,有幾位佳麗跌得好傷,我記得SCMP有一幅相係影到鄭文雅好狼狽咁“wear”d野架..

哇block 你管咁大件事?

Wordy said...

屋企唔睇 A 記,對翁小姐也不存希望,懶得爭電視看。但記得一段小插曲,話說大會綵排加冕程序,抽中香港代表扮冠軍,結果怎戴后冠也不穩,有記者(刻薄地)說旁邊有佳麗偷笑,彷彿譏她「冇咁大個頭冇戴咁大頂帽」~

唔記得塌台既前因後果 lu

你上面段野講到好似 sell 選美年鑑咁,專業得黎好搞笑 ~

好多公司都 block,我地算遲掛 :p

??? said...

當年聽到呢個賽果都嚇一跳, 以為選緊亞太小姐, 不過呢屆整體水準唔算好高, 委內瑞拉, 哥倫比亞呢 d 選美強國派出既佳麗都唔多掂, 反而亞洲呢幾個就明顯比佢地平時既代表改善左, 而且香港又分到一杯羹, 所以對我黎講, "成件事"睇上去就順眼好多, 不過如果將美國小姐換入5強, 飛番口美津穗出黎就更好.

查實墨西哥小姐個亞係 Chinese 黎架, 所以呢5位佳麗全部都有亞洲血統.

79年塌台鄭文雅個張相, 應該係佢從 somewhere "爬番上黎" 既時候影架!

Fun said...

to wordy,
翁虹擺明唔掂啦,佢響泳裝初賽只得18分(min.分數)架咋!無記應該堅持派陳法蓉去選世姐,結果應該會好好多.. 不過個年世姐由亞視主辦,派個港姐去身份又係好尷既~ 咦我都記得「冇咁大個頭冇戴咁大頂帽」事件喎,咁你由記唔記得翁小姐去機場接其他佳麗機兼送花既時候無啦啦喊起上黎話覺得自己好委屈呢?79年塌台既前因後果咪就係豆腐喳台,比賽之後d佳麗hur一聲衝去獻吻,跟住就塌左~~

to無累旅子,
呢年既賽果係亞太過亞太添呀~

TT said...

嘩88環姐真係經典, 大家既gathering真係睇左唔知N次!!

我都記得翁虹呢單野喎, 我記得當年有周刊話佢試戴后冠時, 日本小姐跟某位佳麗立即"耳語", 好似笑佢點會真係等冠軍喎!!

TT said...

typo!! 應該係 "好似笑緊佢點會真係得冠軍"!

CH Mak said...

I also remember this Miss U.
I thought... whoa... Pauline Yeung ho ging ah....

Wordy said...

楊寶玲選世姐時泳裝都係得 24 分(d 歐洲巨人 32、34,差唔多滿分),到最後得亞洲皇后,都有 d 意外(話時話,果屆世姐冠軍「奧地利巨人」好嚇人)。

果單「委屈」料唔記得,但 80 年代末無記 A 記都幾多野爭,之前爭漢城奧運播映權,楊寶玲果屆,李美鳳去台灣選佳樂小姐(記得個名,唔記得係乜),搶左 A 記個位,賽會竟問李菁用「九龍小姐」名義參賽制唔制,一場鬧劇呢 ~

??? said...

楊小姐晌世姐得24分都入到圍呢單野的確幾詭異, 因為有3個佳麗得25分都出左局, 所以都唔怪得有人話佢死好命.

翁虹果單「委屈」料, 係因為佢覺得ATV好 last minute 先 confirm 要派佢去選世姐, 唔夠時間準備, 但又要做東道主招呼 d 女仔, 所以壓力零舍大, ATV 要佢去機場獻花歡迎 d 外國佳麗, 佢覺得自己好似做妹仔咁, 好委屈喎所以咪喊囉. 佢羅18分真係抵打喇, 林建岳有份做 judge 都幫佢唔落, 無鬼用!

Wordy said...

佢真心喊出黎定做戲都好,真係人如其相,好妹仔小家下噃 :p

9 個評判,評分準則冇變既話,每人給 2 至 4 分,唔會有 1 或 0 分出現,連老闆都俾佢最低分?!

Anonymous said...

我記得88環姐那天早上, 每半小時聽着商台的新聞簡報報告最新賽果. 好刺激!

阿寶 Francis said...

我嗰時都幾細個, 但係我都好鍾意睇選美會, 不過...你知啦..香港基本上係好少機會播晒成個足本既Miss Universe. 我唔知點解好鍾意睇佢地個opening 喎, 因為個個都係咁講自己個名同國家, 睇下佢地點可以喺呢1-2秒時間去搶focus,其實都幾有趣! 唉...以前細個次次都係睇新聞先至知個賽果, 好彩而家有人upload 晒上網, 十分good!!!
個泰國小姐, 真係贏到開晒巷, 樣樣都多其他既0.2分以上,真係好突出!!!

Fun said...

to wordy,
係咪真喊就唔知啦,總之佢就接接下機走鬼左去囉~ 佢得18分即係9個評判劃一被佢min.2分囉..

to el,
我係聽港台架當時.. 個心係卜卜跳~

to阿寶,
咁你個陣真係好細,足本係響明珠台播架 :)

Ogake said...

我都記得李菁單野渦,兩位李小姐都去選,點知俾人建議佢用"九龍小姐",佢話肉酸得黎贏左都唔係代表香港,所以最後無選。佢搭飛機返黎香港,ATV高層去接機,仲送上鬱金香添,勁應景。
李美鳳都唔係好順利,去到又唔見左行理,無左套民族服裝,個武則天扮相仲上過K-100介紹過,幾靚架~~唯有臨時搵件綠色旗袍當民族服裝,選完後D行理先出現番~你話係咪俾人整蠱??
楊寶昤最後晚裝一part由天橋行出來果時跣一跣腳,如果唔銑,可能仲高分。我仲記得當時明周都用左頭五名幾位亞洲佳麗做封面架~

Anonymous said...

我當時得七八歲, 但好似無線有將個年環姐當特輯播, 仲係楊寶玲做番主持, 分享佢既感受..仲帶埋佢個獎...個獎大到好似陸運會全場總冠軍個獎咁.... 有冇人RECORD 到?

Fun said...

to ogake,
電眼鳳唔係成套民族服裝唔見架,淨係個頭飾不翼而飛,唔通真係A記做手腳?電眼鳳選佳樂小姐個狀態好麻麻,俾佢入到15選好彩啦!

to kevin,
80年代既環姐通常會響明珠台播一個足本既version先,跟住隔一陣就會剪輯一個一小時版本響翡翠台播,主持就係去參選嗰個..

Ogake said...

補一補,同屆"最受佳麗歡迎獎"既張鳳妮參加89年既"全國際小姐競選"都得到"最上鏡小姐"架~~佢仲好似有得去埋參加之後果屆既國際小姐渦~~唔係頭幾名都有得去參選國際選美賽事,佢算最叻啦~

Agnes Tse said...

我細個都有睇楊寶玲選世姐! 佢囉左"亞洲皇后"獎. 仲記得楊寶玲話韓國小姐唔識英文, 好驚青, 大家要用手語溝通.

FUN哥咁都搵到d片段, 真係勁!!

Fun said...

to ogake,
鳳梨係去左選88年全國際小姐(泰國舉行)同88年國際小姐(日本舉行),跟手返黎香港(88年8月)就卸任啦.. 派鳳梨去選國際小姐既原因係88年國際小姐提前舉行,楊寶玲已經選左兩次、鳳姐又超齡(國際小姐上限係23歲)、阿wing已經選左87年,咁唯有派埋最受佳麗歡迎獎既鳳梨去囉..

to agnes,
韓國佳麗多數都唔識英文既,88年得世姐亞軍個位韓國小姐都係講得好辛苦先講到兩句架咋..

??? said...

其實我有諗過李美鳳唔見頭飾個單野, 會唔會同楊寶玲有關添! 因為佳樂小姐差唔多選得既時候, 環姐亦晌台北開始, 楊小姐同李小姐係台灣既時間係有少少 overlap 架~ 李小姐如果晌佳樂小姐度得獎, 楊小姐就無咁矜貴架啦嘛, 所以佢有好明顯既犯罪動機!!!

Fun said...

點呀.. 即係楊寶玲夜麻麻潛入鳳姐間房度偷呀?好唔convincing囉.. 你想得太多啦~

TT said...

我諗以楊寶玲大姐既性格, 如果TVB連88國姐都叫埋佢去, 佢一定lur飯應, 義不容辭咁應承。不過以佢當時既勢, 真係可能會做多次奇蹟都唔定架!!

Anonymous said...

Fun 哥, 依你的分析, 如果李嘉欣當年没有退選環姐, 她的成績會比楊寶玲好嗎?

Fun said...

照我睇李嘉欣都係唔得架啦..

正如我所講,楊寶玲真係夾晒天時地利人和架,89年環姐響墨西哥舉行,個年基本上係歐洲佳麗當道.. 再加上李嘉欣雖然係靚,但係佢個種靚響外國人眼中可能只係”ok”囉,反而無楊寶玲咁有“東方”添!仲有環姐幾睇對答表演,李嘉欣當時應該麻麻.. 最後,佢身材都唔係好掂啦.. 所以.. 佢響世姐都滑鐵盧既話,環姐仲唔會得架啦!

ben said...

YOUTUBE已經有完整版本既1988環球小姐靖競選,分開10個部分,我已經將佢全部DOWNLOAD落黎!順帶一提,1995年環球小姐香港代表譚小環在預賽中的晚裝環節得到8.99,差不多到達9分,比很多當年歐洲和美州代表高分,成績不錯了!成績最差的是1996的香港代表李嘉慧,排名最後十強!

Anonymous said...

Very happy to read some many comments about Miss Universe 1988! I am a fan of MSHK and Miss Universe too. So great to read so much analysis and comments on Pauline and the 1987 winners.

If only Pauline went to Miss International 1988, maybe should would make the top 15!

And I never thought of her going to MCI 1988... maybe if she went, she would win it too!

Lastly... if only Michelle went to MU 1989... I wanted to see how she performed...

Fun: If you have the old newspapers on Pauline's win at Miss World and Miss Universe, can you send it to me?? My e-mail is Samuel72991@hotmail.com.

Thank you for this great blog entry, it is great!

Anonymous said...

to無累旅子
Pauline入圍MW可以算好彩,因為該年十二強中,五大洲都各有一個入圍名額。Pauline亞洲佳麗中最高分,所以入圍前十二,最終好似第九,可以算好彩。(亦因亞洲佳麗僅一人入圍,所以她獲得亞洲皇后......不過Pauline真係唔錯架I luv Pauline)

Anonymous said...

So if you tгuly require a excellent аb belt,
here are ѕome alternativеs ωhich you can look at.


Also visіt mу web page blueoxygen.org

Anonymous said...

Hellο there! This is my first viѕit tο your
blοg! We аre а collection of ѵolunteers and starting a new initiаtive іn a соmmunity in
the same niche. Your blοg ρгoviԁed us ѵaluablе informаtiοn
to work on. You hаѵe done a extгaordinаrу
jοb!

Feel free to visit my site :: Simply Click The Next Internet Page

Anonymous said...

Very gοoԁ post. I will be experiencing some
of these isѕues as well..

Also visit my web ѕite; V2 Cigs

Anonymous said...

Together with electronic cigarettes,
most people are pleased with a couple of puffs, saving the rest pertaining
to later on. E-cigarettes less complicated cheaper than regular tobacco.
Determined by in your geographical area, a new bunch of normal smoking may cost anywhere between $5 along with $12 a new group.

fulayl said...

investigate this site have a peek at this site click reference Website i thought about this gucci replica handbags