12.16.2010

銅鑼灣日式鐵板燒 - 花盃

上星期六為網友慶生,
生日飯局揸旗人叮囑不要洩露口風,
因為這是個小小驚喜派對。

無問題,我一向最口密架啦~

揸旗人著我們先到館子坐定定,
而佢本人就會遲一步才帶壽星仔施施然出場,
到時就全人類突然we嘩鬼叫,夠晒驚喜啦啩?!

點知..

因為當晚是吃鐵板燒的關係,位置實在無遮無掩超張揚,
所以我們唯有用餐牌掩面,然後就“哇”一聲嚇鬼壽星仔..

係喎,壽星仔其實驚喜唔驚喜呢下?

說回這一餐,地點是銅鑼灣的高級日本料理《
花盃》,
經過就經過得多,但就從未幫襯過,
今次終於有機會試試係咪如傳聞中咁good!

從餐牌所見,除了單品(a la carte),
還有多款套餐,由2人起到8人都有,
不過壽星仔就決定散叫宴客。


先來沙拉
再來壽司
食得未啫?
咦,鐵板燒有荷包蛋?事情是咁的,當日我無食lunch,去到8點幾真是餓到暈咁滯。就係等食時,見到檯上放了一碗雞蛋,我打趣說:好肚餓呀師父,不如煎住隻蛋頂下先啦!點知.. 轉個頭師父真係一人煎了一隻勁靚的荷包蛋!喂,呢啲咪係星級服務囉
超大隻帶子
鮮味爽口,一滴豉油都不用再加
超大蝦,足足十吋長
肉質彈牙,同帶子一樣,千奇咪點任何醬料
龍蝦sssssssssss
ta.. da.. 龍蝦上碟啦
咁多塊方包搞咩乜鬼呢?
原來是師父特別為我們安排的鐵板燒吐司。做法好簡單,面包兩面都塗牛油及洒上白砂糖,然後用銀鑊鏟把面包壓平
簡單而可口的吐司就可以上碟啦
美國薄切牛肉
薄切後以粒狀登場
白面豉湯w/蝦膏;面豉湯加進了吃的大蝦蝦頭的蝦膏,甜到呢
鐵板燒一般都會以炒飯作結,今餐都不例外

花盃能在日式料理多如恆河沙數的銅鑼灣中屹立咁多年原來是有道理的,食物質素好(連杯咖啡都好飲囉)之外,服務也體貼,尤其是那個鐵板燒師父,遇著我呢啲講不停的食客都無黑面兼全程我一句佢一句,真好玩。

係喎,究竟呢餐幾銀啫,我未俾$$呀!

3 comments:

Wordy said...

驚喜,絕對是本年 highlight 之一,上次「生日會」係小三囉,好多謝您同其他來賓 :)

最喜歡大蝦頭的膏和甜吐司

未俾$$?咁我俾多次機會你,哈 ~

Fun said...

小三?唔係掛 :p

唔係講笑,其實杯咖啡都係highlight!!!

真係要問下吉士幾$$先..

哈,幾時呀?

CH Mak said...

都话我地去楼下农圃再战咯。

不如就一月头啦!