7.08.2010

銅鑼灣新餅店

大家有無聽過Causeway Bayrian呢個term?
Causeway Bayrian可解作銅鑼灣人or銅鑼灣原居民!
無聽過?都唔奇嘅因為係我作架嘛.. 哈哈哈..

自出娘胎我已經住喺銅鑼灣,
由加拿大回流香港繼續住銅鑼灣,
然後.. 做gym喺銅鑼灣、行街行銅鑼灣、
睇戲喺銅鑼灣、出街食飯都係銅鑼灣.. 多!
所以我稱自己為Causeway Bayrian應該無人會有異議~

作為銅鑼灣人,當然要對呢個地方嘹如指掌,
例如邊度開咗新食肆、邊間舖頭接咗都要知得快過人!

今日我又有新發現啦,即時報料先!
下晝5點幾當我經過景隆街(總統戲院對面),看到有一堆人排隊,
心諗:唔通又開咗貢茶?
行近啲一望,哦.. 原來係港姐謝寧嘅曲奇餅店進駐銅鑼灣!

謝寧主理嘅曲奇四重奏喺九龍城已經闖出名堂,
今勻進軍銅鑼灣唔知有無咁順利,
話晒呢度競爭真係劇烈好多,加上勁貴租金,
真係少啲生意都唔掂!
曲奇四重奏嘅曲奇我食過,質感唔錯,也算鬆化,
但可能標榜健康嘅關係,所以甜度及牛油味都偏淡,
有好多人都未必接受。
不過除咗曲奇,佢哋嘅另一鎮店之寶butterfly so (蝴蝶酥)又的確係好,
各方面都比曲奇做得好!

各位網友有興趣嘅話,不妨買一包試試,
買完曲奇仲可以行過馬路買埋杯貢茶添!

餅店今日先開張架咋,唔知新屎坑可以keep到幾耐人氣呢?
咦,有記者幫謝寧影緊相喎

5 comments:

TT said...

好心你就扮記者入去影一張相然後WHATAPPS我啦真係

naruto said...

記者影謝寧
你影記者影謝寧
唔知有無人影你影記者影謝寧呢?

Leo said...

咦,就腳喎,得閒試下先!

KennyT said...

你個"butterfly so"﹐真心笑左﹗

Leo said...

試咗"butterfly so",係得喎!