2.25.2010

地鉄乘客10宗罪 (重新上載)

今早搭地鐵上班,在往佐敦的車廂中又遇到一位剪甲伯,真是想衝上前@#$%^%&%*#他然後大把大把摑埋去!!!係咪人嚟架?!?!

記得兩年多前寫過一篇關於在地鐵經常遇到的《地鉄乘客10宗罪》,既然今天還沒想到寫甚麼,就順水推舟重新上載舊文,呃呃卜啦~

(舊文原貼於07年8月3號)

我每朝都是乘地鉄上班的,還要是在最繁忙的時候上車,累積了10年的“經驗”,地鉄乘客の罪可歸納為以下10項:

1. 濕髮少女 - 人迫迫,人貼人的情況日日出現,在下最怕那些留有一大把長長秀髮的女士們,晨早洗完頭濕立立就衝上車,成陣洗頭水味攻過嚟。有時她們更會“輕撥”秀髮,成把撻埋嚟,嘩多謝晒! (想死指數:6.5度)

2. 報紙男 - 當人貼人的時候還有些乘客(多數為男乘客)可以事無忌彈的攤開份報紙睇,彷彿只有他一人在車箱中! (想死指數:5度)

3. 挨柱怪 - 有很多乘客是無腰骨的,可以整個背脊挨落條柱度,總之理得你! (想死指數:6度)

4. 淑女型 - 無論靚與唔靚,總之你一上車她們就會用銳利的目光對準你的瞳孔,像說著:你唔好掂到我呀吓.. 阿姐,你估我好想同你咁親密咩,我都唔係好想你掂到我呀!(想死指數:7度)

5. 裝假身 - 明明前面有位,但是死硬唔郁,當後面不斷有人迫入車箱的時候,他們也只會使出一招裝假身,即是上半身稍微移動,但其實雙腳穩如泰山,一分毫都無郁過! (想死指數:7.5度)

6. 中國長城 - 正當人頭湧湧上車的時候,有些乘客會一行入車箱就成堵長城咁“棟”響門口,無論你點樣推他們都是企硬的。 (想死指數:7.5度)

7. 大聲公 - 當車箱是屋企,以高達100分貝的聲浪講起碼5分鐘的電話,噪到呢.. (想死指數:8.5度)

8. 小狐仙 - 人如其朵,不只在夏天出現,一年4季都隨時可以天生體味襲擊乘客,分分鐘勁過沙林毒氣!(想死指數:10度)

9. 小蠻牛 - 永遠唔會俾乘客先落車,總之車門一開就撞過來,上遲一陣她們應該是會死的。不要以這是蠻牛只限於男性,我在中環有碰過穿Jil Sander的靚女蠻牛!(想死指數:9度)

10. 滿車盡帶黃金甲 - 不下數次見到有乘客從袋中取出指甲鉗,啪啪聲的在剪手/腳甲,“黃金甲”更加不斷左飛右片,避無可避。剪黃金甲者有男有女有老有嫩,有些還是斯斯文文的,無野講! (想死指數:10度)

大家還有甚麼地鉄奇遇可分享嗎?

15 comments:

Anonymous said...

no.10, what the FXXK!

Simon said...

I think the problem of 報紙男 is getting worse, now that we have all these free tabloids flowing around. When I take the subway in the early morning, 90% of the people 攤開份報紙睇 as if there is no one around them. And that deserves a 10度 想死指數!

Jessica said...

HK people sucks BIG time! shame shame shame!

Phil Chan said...

聽過食榴槤

naruto said...

4.我會望番佢架

5/6.呢個,我經常破解。。。一腳踏落去,唔縮你嘅事

7-10.真係唔識破解

我最憎D人。。。見到大肚婆/阿婆阿伯,死都唔讓位囉

Anonymous said...

因為香港人大部份都係自私同無教養, 完全唔識尊重別人.

KennyT said...

11 有D小朋友好似馬騮咁係車箱擒黎擒去﹐飛黎飛去﹐然後D父母又唔理。

12 有D人鍾意俾自己的物件如手袋﹐濕平後既戰利品﹐坐一個坐位。

13 落車後上電梯時D人好鍾意嚮則邊攝入﹐同打尖無乜分別。

14 車箱裡打晒車輪+肉體纏綿有如性交動作的情侶。

15 不顧個人衛生的乘客﹐尤其時好起勁地挖鼻個D﹐好很怕呢D人挖完後再渣住扶手。

阿ta said...

真係好噁心..............
好冇品!

mi said...
This comment has been removed by the author.
mi said...

我都唔明哩一班人究竟係邊鼠鄉下興係街剪指甲!十個火! 我又係唔明香港點解有敢多濕髮晨女;知唔知濕水好痴塵烏糟過唔洗;重要D比痴塵濕髮拒"拂"到面,十個火!

我既其他恐怖經歷:
Case 1: 話說有次搭23號;我後面個C9係到啪啪啪;拒果行係高我果行成級;嚇到我成個彈起唔係米滿頭黃金甲!

Case 2: 坐地鐵;隔離C9又係開礦;我咪啤下拒希望拒知有人望到唔好敢倡狂;但拒隻手都係好唔受控;多次忍唔住係鼻邊徘徊又瞄到D指甲捆晒黑邊;我都係最後拒都係要撩左一下再彈!

Case 3: 係澳門往香港既船,我隔離過行個阿伯由上船開礦到落船重要揩落條柱同彈彈彈;一個鐘無停過唔明係咪真係有甘多鼻鼠呀;無位掉唯有盡係人事用外套包住自己

Case 4: 返工巴士上男人老九(起碼40)肆無忌憚係到同拒BB豬用BB話係到綿綿情話;又大聲最後重加上o屋o屋啜啜錫錫......成車望住拒!!!

Fun said...

哈哈.. 一講起呢d地鐵怪大家都好火!

最慘係你鬧佢,佢仲擺出一副好無奈,唔知做錯咩既樣先想扯多佢幾把!

Agnes Tse said...

挨柱怪 = 柱男 or 柱女!!

Alex_C said...

3. 挨柱怪 --> 而家已經開始進化到攬柱怪,無左條柱會企唔到咁款...

11. 繁忙時間火車常見,(大約)十零個疑似中年男子會坐晒喺車頭駕駛室附近,有時唔夠位仲會坐到去門口位,其他乘客就無位企。最近喺某幾個站會有職員叫啲大爺起身,不過佢地一於好少理,唉...

Anonymous said...

我懐移好多老一D的電車jerks都是新移民。
Susanna

Fun said...

電車jerks, 電車男d friend!!!!