2.04.2010

審死官舞台劇 - 業餘過業餘

前晚得到兩張舞台劇《審死官》門票,
但.. 去唔去好呢下?umm.. 睇下有咩陣容先~
盧海鵬.. 扮唔扮木村架?朱咪咪.. 唔係做返奶媽喎!
樊亦敏.. 把聲超煩,改名煩亦敏啦!
李龍基.. umm.. 柳影虹.. 唔係唔唱“一百分”呀~
其餘人腳仲有:吳沅儀、李麗霞(黑妹)、王俊棠等等..
呢個cast真係.. errrr..

不過我又諗,套劇喺新光戲院做喎,
當年老豆經常喺嗰度做司儀我都無去過,
而家仲話唔埋好快會拆添,應該要去一去啦呵?!

8點開場,去到北角已經7點半.. 聽聞新光戲院側邊(書局街)呢檔“十三座牛雜”好出名架喎,隊返串先
牛雜8蚊串、20蚊一小兜、20蚊就大大兜.. 牛雜的確好入味,但第二日我屙咗3次喎,唔知..
盧海鵬同朱咪咪係舞台劇其中兩大賣點.. um.. 得佢兩個撐唔撐得住呢
戲院大堂有好多藝人送上既花牌,當中包括:長腿亞姐萬二蚊同老公Thirteen Chan
入場啦.. 哇.. 個年齡層真係.. 50歲以上啦
場刊入面攝咗張“雷安娜彩雲再現”演唱會既flyer喎,嘉賓係小虎隊添.. 咪住,係分開寫林利、胡胃康同蔣慶龍3個名寫架喎,係咪廢市再俾人呢個組合根本就唔係小虎隊呢
謝幕

成套劇3粒鐘,製作真係拿西中的拿西!首先無佈景可言,跟住所有演員啲咪係feed既,宏宏聲宏足3粒鐘,對耳超辛苦.. 仲有,負責音響個位人兄成日無熄後台咪,搞到漏晒聲,嗰啲“就得啦就得啦”同“快啲啦快啲啦”出晒街!最後講埋啲演員,大部份記對白都好差又忍唔到笑(尤其係黑妹),有經驗如盧海鵬就兜得到啫,但係其他就真係算吧啦~ 成個劇俾人既感覺好業餘,拉雜成軍咁,衰過中學話劇團呀!最貴票價仲要收成三舊六,好心就俾啲力水啦.. 不過前晚係首演,希望之後會好啲啦下..

2 comments:

KennyT said...

真係估你唔到

naruto said...

8蚊屙3次,兩個幾疴一次,超值