2.23.2008

食錯藥

我成日同啲朋友講,想我死好易,只要趁唔覺意掉一粒阿士不靈落我杯嘢飲度,然後等我藥物敏感發作兼唔准我去睇醫生,咁我就係咁大~ 記得第一次意識自己有藥物敏感係頭一年去加拿大讀書,嗰次因為大感冒,家姐俾咗兩粒阿士不靈我拍,點知.. 過咗15分鐘之後隻左眼開始好痕同狂標眼水,初初以為係感冒病徵,點知話咁快就連眼蓋同眼袋都腫起嚟。家姐見到我迅間變豬頭,嚇到即刻飛車同我入院,醫生一睇就話係藥物敏感,以後唔可以掂阿士不靈或者散利痛,跟手仲寫咗張咭俾我袋住,萬一有咩事啲人都知我藥物敏感!

後來返咗嚟香港,經朋友介紹下遇上林醫生,一睇就8年,最初佢曾經開過一啲阿士不靈或者散利痛以外既止痛藥俾我,點知都出過幾次事,摸吓摸吓先知我受得邊幾隻藥。喺呢幾年,都曾經試過有三/四次藥物敏感,主要都係自己唔聽話,亂食成藥出事,而呢幾次既情況就更加一次比一次嚴重,唔單止眼腫,連呼吸都有啲困難。醫生話年紀越大通常情況會嚴重架喎,唉~~ 又係關年紀事!

好啦,話說上個weekend開始,我既左邊頸近膊頭位置開始赤赤痛,過多兩日連右手都被扯到好痺,到咗星期三直情痛到坐立不安。於是我即刻打電話去卜睇開個嗰therapist,點知佢要禮拜六先有期,咁無辦法唯有拍住panadol頂住先,但係完全無幫助囉。禮拜三一起身,哇.. 仲痛咗添,喺lunch既時候我短訊朋友L (佢屋企係開藥房),問佢有邊隻勁啲而我又受得既止痛藥 (佢係知我有藥物敏感)。於是我聽佢既意見買咗一隻V字頭既止痛藥,一食.. 真係噢畸喎,起碼減低咗4成痛楚。跟住返到公司做咗大概兩個鐘頭嘢,突然間左眼開始標眼水,又痕痕哋.. fxxk,又中招!?!呢次情況如醫生所講,又比先一次嚴重,唔駛5分鐘隻左眼已經腫起晒,呼吸又開始唔係好暢順,而我個豬頭樣就更加嚇親周圍啲同事。於是我即刻飛的過海去家庭醫生度啦,喺途中我越嚟越辛苦,左眼腫到得返一條線既同時,右眼亦都開始腫,又不斷標眼水鼻水,呼吸亦越嚟越辛苦,當時個心真係慌到不得了!一衝入診所,我都唔理得其他病人咁多,即刻同姑娘講話好辛苦,姑娘見到我咁既樣都即刻叫其他人讓一讓路。一見到醫生我即刻拎個排V字頭既藥佢睇,佢話:呢隻都少人敏感架喎.. 你下次買成藥打俾我問下先嘛。嘩,你今次好嚴重喎,連眼球都漲大,同你打支針先然後再食抗敏藥,20分鐘度會鬆啲架啦。跟住我過咗另一邊個細房訓咗大概一個鐘先好返啲,然後再休息多一陣至可以慢慢爬返屋企,一路上我一路垂低頭,好鬼驚俾人見到個豬樣。由於今次真係腫得好利害,要成差不多3日先還原真面目,辛苦晒~ 我話過以後有咩事都會打俾醫生問吓先架啦~~ 朋友L,你又唔駛內疚既,你又唔係有心,總之他日我有咩衫長褲短,你記住第一時間仆出嚟話俾啲人知我有咩藥係食得架啦!

有朋友問我個豬頭樣係點架喎.. um.. 我諗諗吓係有啲似中國超模燕囉!兩隻眼都係得一條線,只不過係我個對眼大概腫多4倍之嘛~

9 comments:

F4 said...

Fun, 小心身體呀. 我們還有飯局. 待你再好一點立即成行吧.

naruto said...

腫咗都似超模,算唔算係不幸中嘅大幸?

小心啲啦!唔好試新成藥啦!

我都有敏感,係薰衣草,所以我唔比附近D人用薰衣草潤手霜,我會即刻頭痛,嚴重會嘔。

ps:有無影相留念(講笑咋!)

TT said...

嘩... 如果腫左似呂燕, 咁其實都會幾似萬寶寶架喎!!

休息多D啦!

Gary Lam said...

喂, 你既膊頭同頸既位會唔會好似我咁好似有啲肌肉勞損咁呀, 或者係肌肉發炎呀, 係既話可以揸下啲冬青膏呀, 按摩膏呀, 咁會好些少...

Ogake said...

睇下張相再睇下你上一個post的相,再比對下我就覺得好好笑。不過藥物敏感呢家野真係要小心,嚴重得來係會死人的~~

Wordy said...

藥物敏感時有所聞,你的情況也挺嚴重。

去年媽得感冒看醫生,她卻對其中一種(當時已為新西蘭和新加坡禁用的)抗生素敏感,影響了腎功能(從排尿情況知道),可看了二十幾年的家庭醫生卻堅決否認跟藥物有關,還要我媽繼續吃藥。當然是馬上停服,改看中醫,吃了近兩星期補腎藥和感冒茶,情況才好轉過來。

藥物敏感這回事真是防不勝防。

Anonymous said...

呂燕有輯相好型,遲d post出來

Fun said...

呂燕咁既樣,係要行“型”架啦~

Anonymous said...

你個朋友L都唔上網既....