2.10.2008

鼠年赤口飯局


有幾年無搞過開年飯局啦,今年因為好多朋友都留喺香港過年,所以順應民意又搞一次。初初諗住十零人算數,點知搞搞吓搞出成廿三人出嚟,好鼎盛。而經過諮詢同覆核之後,年初三係最齊人既,咁就年初三囉,話之嗰日係赤口啦。部份賓客準時五點蒲頭開檯發新年財,三檯麻雀,兩檯台灣一檯廣東,嘈喧巴閉,好高興~ 我最後都贏咗一舊水,開心晒!

呢檯背住鏡頭嗰位一贏三囉~
呢檯帶冷帽嗰位就一輸三喎~
由廿二張檯組成既一張超長檯,好grand呀~
等緊開餐,大家傾吓偈先~

咁赤口飯局有咩食呢?大家睇睇.. (其實仲有乳豬全體、拼盤同合桃露架,不過唔記得影低)

左:木瓜鮮魚湯;右:炸海鮮卷
左:西蘭花帶子吊片;右:斑片兩味左:發財好市;右:炸子雞
左:糯米飯;右:干燒伊麵
左:壽桃;右:大大個勁好味,好多蓮蓉同好大個蛋黃囉~
大家食得幾開心!恭喜發財~
DC直豎姆指,唔知係咪話啲野好食呢?
過年咁高興梗要開香檳啦~

食完飯,部份朋友就返咗屋企,我哋呢啲咁爛玩既就梗係過場繼續飲飲飲同唱唱唱啦..

DC/ST/Fun/KC/AL
喂,玩夠啦,大家好返屋企啦~
喺擾攘期間TL被發現想偷走,佢登時俾劉姑用膠袋笠頭,差啲窒息呀陰功~

5 comments:

阿寶 said...

有線眼同我講話靚女ST 同一大班靚仔喺上邊飲野, 原來又係你地, 哈哈~!!!!
總之我都同d妹妹上去開下年~!

Fun said...

哇,有線眼添.. 個日好大班靚仔咩?我唔覺喎,不過3幾個就有既 :p

阿寶 said...

當然啦~!!! 我勢力橫跨十九區酒吧, 哈哈~!! 可唔可以介紹0個3幾個黎識下咁呀...? :P

Fun said...

阿寶飯局,有無利是收架先? :p

阿寶 said...

係都你俾我先啦~!!! :p
哈哈~!!!!
咁係唔係有好野介紹先?
係我就封個媒人利是俾你!