地鉄乘客の10宗罪
我每朝都是乘地鉄上班的，還要是在最繁忙的時候上車，累積了10年的“經驗”，地鉄乘客の罪可歸納為以下10項：
1. 濕髮少女 - 人迫迫，人貼人的情況日日出現，在下最怕那些留有一大把長長秀髮的女士們，晨早洗完頭濕立立就衝上車，成陣洗頭水味攻過嚟。有時她們更會“輕撥”秀髮，成把撻埋嚟，嘩多謝晒！ (想死指數：6.5度)
2. 報紙男 - 當人貼人的時候還有些乘客(多數為男乘客)可以事無忌彈的攤開份報紙睇，彷彿只有他一人在車箱中！ (想死指數：5度)
3. 挨柱怪 - 有很多乘客是無腰骨的，可以整個背脊挨落條柱度，總之理得你！ (想死指數：6度)
4. 淑女型 - 無論靚與唔靚，總之你一上車她們就會用銳利的目光對準你的瞳孔，像說著：你唔好掂到我呀吓.. 阿姐，你估我好想同你咁親密咩，我都唔係好想你掂到我呀！(想死指數：7度)
5. 裝假身 - 明明前面有位，但是死硬唔郁，當後面不斷有人迫入車箱的時候，他們也只會使出一招裝假身，即是上半身稍微移動，但其實雙腳穩如泰山，一分毫都無郁過！ (想死指數：7.5度)
6. 中國長城 - 正當人頭湧湧上車的時候，有些乘客會一行入車箱就成堵長城咁“棟”響門口，無論你點樣推他們都是企硬的。 (想死指數：7.5度)
7. 大聲公 - 當車箱是屋企，以高達100分貝的聲浪講起碼5分鐘的電話，噪到呢.. (想死指數：8.5度)
8. 小狐仙 - 人如其朵，不只在夏天出現，一年4季都隨時可以天生體味襲擊乘客，分分鐘勁過沙林毒氣！(想死指數：10度)
9. 小蠻牛 - 永遠唔會俾乘客先落車，總之車門一開就撞過來，上遲一陣她們應該是會死的。不要以這是蠻牛只限於男性，我在中環有碰過穿Jil Sander的靚女蠻牛！(想死指數：9度)
10. 滿車盡帶黃金甲 - 不下數次見到有乘客從袋中取出指甲鉗，啪啪聲的在剪手/腳甲，“黃金甲”更加不斷左飛右片，避無可避。剪黃金甲者有男有女有老有嫩，有些還是斯斯文文的，無野講！ (想死指數：10度)
大家還有甚麼地鉄奇遇可分享嗎？
15 comments:
最怕嘈，佢地可以
1/ 濕髮少女...少女已較好，我經常遇到"姆明"狀嘅C奶。
2. 報紙男...如果唔係張份報紙"high"過嚟，尚可接受。但睇完扔在位就不可接受。
3. 挨柱怪....有時男人我會照用，女人驚佢嗌非禮。
4. 淑女型...呢個無咩留意，唔通淑女都唔望我。
5. 裝假身...我真係無你咁細心。
6. 中國長城....係呀，就算唔識都突然好團結
7. 大聲公...最最怕呢樣
a/大聲講電話﹣講無聊／廢話／壞話講足全程；更甚者一個電話接一個電話但話題相同，有D懷疑佢地無左個電話不能生存，亦懷疑佢地已經嘈到自己撞聾，所以要咁大聲講嘢。
b/明明係識嘅但就坐對面或四角，嗌住嚟傾偈，嫌大家臭。
8. 小狐仙...通常都狐仙都唔會小。
9. 小蠻牛...最怕阻人出入﹣大量行李／手推車／嬰兒車，塞正出口位但死都唔讓。
10. 滿車盡帶黃金甲...超嘔心
其他：
一上車用盡氣力搶位坐。
多人時仲要車頭行去車尾。
座位剩一個但佢個身軀絕對唔只一個。
女人硬錚拖鞋或男仕厚硬底皮鞋，上落escalator時（尤其趕車）嘈到耳痛。
有好多速遞員鍾意成棚人一上車就大大聲係咁傾係咁講(返工時間最常見), 嘈喧巴閉, 我絕對尊重速遞員呢個行業, 但係佢地呢個行為真係好 annoying, 要大力打!!!
在日本, 若在一個擠迫車箱中揹著背包也是很不禮貌的行為. 十年前還會有廣播叫乘客脫下背包的(近兩三年好像沒有了).......
也實在是, 揹著背包的人左右前後移動時, 老實說對周圍的人造成痛苦指數也有8.2, 只是當時人不知道而已。
看日本電視節目的調查, 地鐡電車最討人厭行為的首三位分別是...
1)在人多車箱中談手提電話(所以日本一直好像沒有發展地鐡電車的手機網絡, 近年則不知道)
2)健全人仕霸佔(有需要人仕的)優先席
3)在人多車箱中揹背包
> Donald Kwan said...
>
> "在日本, 若在一個擠迫車箱中揹著背包也是
> 很不禮貌的行為"
Interesting. Years ago when I was still living in Hong Kong, a female friend of mine told me that she "has" to carry a backpack when taking subway because of the perverts in subway train try to grope her from behind when the train is packed(something not uncommon in Japan too). I guess in Japan, women have one less option to protect themselves from sexual harassment. Are you glad that we are guys? :-)
轉左工之後返工返早左，搭地鐵好鬼迫人，仲要轉親車都要等一兩班車先至上到，上到仲要勁迫，最怕既係夾硬要同核突男人身貼身，至少難捨難離三數分鐘先至分得開，好惡頂。
另一種怕既係，人多多仲要打遊戲機既人。咁迫人你就咪打機啦，打少一陣會死咩！明明已經迫，你唔扶穩就好容易前跌後撞，我今朝返工先至俾條打機友打左我一拳～
我見過嘔心既項目係：一堆有親屬關係既人，有大有細，有老有嫩，有男有女，細者廿歲頭，大者四五十，屬姨媽姑姐輩，假日非繁忙時段，兩邊座位坐各霸兩三個，先大聲談話，及後，年青男子（完全不掂 + 有女生feel)拿出"面油紙"一pack，派全家！人人有份，永不落空，勁齊心將呢張藍色既面油紙"同一時間"合力往自己臉上推，一下不夠再反覆污辱，咁多人望住佢地錯誤使用都算，最嘔心既係，之後一齊舉起"鬥．油．多"，而家寫番都想嘔....唔得....我都係去洗手間嘔左先........
我上班不乘地車，平日上街就視乎情而定。
最討厭「柱男」「柱女」，有次一對穿 G2000 行政套裝的情侶上車，女的一臉疲累，突然把額頭靠在我手背上，她男朋友竟然視而不見，只不停撫摸女友背部，到下一個車站那女的才若無其事地把頭挪開。
（通常）靠在車門兩旁的連體嬰和痴男怨女也是妙品。
在車門關上前最後一秒不顧一切撞進來的該拿去做鬥牛。
打機沒有公德，要全車人聽着九流的遊戲配樂。
還有食叉燒飯，剪腳甲，兩人坐三位……
4. 實不相暪, 我都係淑女...
10. 我都唔明點解有人會在屋企以外的地方剪指甲
呀...
我最憎d細路係度渣住條柱轉轉轉
人地冇野扶住之餘,又會撞到人
我一見到呢d細路咁玩法,
我會即刻啤過去=.=
我真係試過響車廂(巴士) "叫停" 一個剪指甲既女人.... 我直頭係唔客氣果隻, 直斥佢破壞衛生, 好彩都有乘客幫下口!!
仲有就係0係地鐵車箱入面開大餐,仲要食埋d熱騰騰,濃味既野.0係唔應該食野既地方聞到食物既味道其實係一件幾惡頂0既事.
不過最怕就係d人0係地鐵入面大聲講電話,好明顯呢d人以為擴大自己0既聲浪,就可以蓋過地鐵本身0既嘈雜環境,大佬呀,我無咩興趣知你今晚幾點打波,幾點同邊個食飯架咋,最煩既就係,呢d人講電話,唔會傾兩句就算,講足幾個站,收線,以為可以靜下,唔到30秒,又打!!收左線,唔到20秒,電話又響,又傾,點呀!!大聲講電話比講粗口更滋擾,到抵香港政府有無做過調查架!!
The MTR itself is annoying too in many ways:
1. That they keep telling you every 15 seconds in 200 db that the train will come in one minute (pronounced as 'da tram will calm inn won mean neat')
2. That the intercom keep blasting out announcements that next stop is so and so. Try standing near the intercom early in the morning you will know what I mean
besides the problematic pronunciation, their tone is really terrible 2, sounds as if they are yelling at you.. slap slap slap~~
淑女嘛... 其實人家目光怎樣放, 又真的有甚麼所謂?
其實, 還有一樣討人厭的事, 下雨天總有不少人不把傘收好才入車廂, 結果已濕的西褲變得更濕.
背囊呢, 其實我都有用, 這時我才知道原來這麼多人不喜歡. 不過呢, 今早搭地車時人擠, 我才讓出一些位置, 就有一位妙齡女子用她的手袋逼過來(怕我非禮吧), 結果我就用背囊反控一把... 很無聊吧.
聲音才是最大的滋擾, 所以iPod是我在公共交通工具的最好朋友. 當然啦, 如果要完全遮聲, 恐怕耳朵早聾了.
I am going deaf with my iPod blasting at 100db to avoid noises riding the MTR. Any good lawyer out there for filing a lawsuit against them?
關於這類噪音，不止在地鐵，巴士都好嚴重，尤其長途車。我一見到有人掛住個"藍芽"就避之則吉。
Post a Comment