歡樂肥肥‧再會

肥肥走了，縱然一直有心理準備，
但收到消息的那一刻，依然悲慟，
她是一個icon，一個永遠開心的icon，
肥肥，無論你去到那裡都要keep laughing啊..

昨晚電視不斷播放著很多肥肥的電視演出精華，
當中有許多她的歌唱片段，但唯獨欠我最愛的《女人三十》！
不過記憶所及，肥肥應該從未公開演唱過這首歌吧。

歌曲是來自無記70年代末一套單元劇《女人三十》的主題曲，

每集以不同階層/背景女性述說不同故事，

內容以當時的尺度來說絕對是前衛兼大膽，

而肥肥除了唱主題曲外，還是其中一集的女主角喔。

兒時第一次聽《女人三十》還以為是甚麼歌星，

直至打出credit的時候才知是肥姐，登時嚇了一跳，

因為很難想像肥姐可以唱得如此滄涼，感情滿瀉。

唉.... 歡樂肥肥，再會.. 各位觀眾.. 晚安~~~

SATC大電影‧熱烈期待中

嘩，終於見街啦~
聽講香港同美國會同步公映喎，
上映期如無意外係五月底，十萬個期待喔！！
上面個張應該係第一款海報，得Carrie一個撐住，
不過可以理解既，佢始終係焦點，
大電影亦係以佢同Big既婚禮作為序幕。
但係除咗Carrie之外，我仲好想知..
Samantha同佢個超索model男友Smith而家點喎？
Charlotte同Harry終於有無愛情結晶呢？
Miranda有無搵到第二春呀？
Jennifer Hudson個角色做咩架？
雖然我盡量叫自己對電影版唔好有太高期望，
不過作為忠實粉絲，好難無期望囉，
哎呀，快啲到五月啦~~
我諗住咁呀，因為身邊有好多朋友都係粉絲，
不如到上映既時候約埋一堆人去睇啦 (夠人數最好包一場添)，
睇完仲要有after party，因為大家實有好多嘢傾架嘛，
好，等我籌備吓先~
喂喂，得閒去睇吓佢哋個官方網站啦，有個blog添架~

各位，睇住劇照頂住先啦~

是但一個星期六的下午

年初四跟MM及Richard去文武廟攝太歲，

萬人空巷，善信誠心祈求新一年萬事順利，

完事後Richard提議找個地方喝杯咖啡歇歇腳。

我們沿著荷里活道向中環方向走，

冷不防走不到5分鐘便發現了這家cafe - 《CLASSIFIED》，

咫尺之間，現代vs古代，畫面是挺有趣的。

其實毗連文武廟的這片地方，先前一直荒廢著，

直至恆基拍版興建高尚酒店式住宅《聚賢居 》，

以及巴之閉的《Mint》及高檔餐廳《Press Room》相繼登陸後，

這一帶才hip了起來。

《CLASSIFIED》屬於《Press Room》的姊妹店，

相比起中上環很多cafe，它的面積已不算小，

樓高兩層，二樓是cheese room及酒庫，地面則是cafe部份。

星期六，無無聊聊的在家hea了一整個上午，

差不多三點鐘才相約WL在《CLASSIFIED》吃個brunch。

這天天氣回暖，還有點陽光，於是我們挑了戶外的位置吸收太陽精華。

是日到來吃brunch的九成是老外，只有我們二人前是本地貨，

剎那間有點像回到多倫多的感覺，好得意喔！

這趟因為吃brunch所以特意細閱餐牌，

原來除了一些輕食如三文治或沙拉外，

還有pasta、不同的cheese platter及芝士火鍋，

那天我就看到鄰桌的兩名外籍少女正在大快朵頤。

聽說這裡售賣的芝士都很有質素，下次找個志同道合的來試試吧！

在香港真的不容易找到一處這麼開揚的地方，

to see & be seen，挺寫意的..

待我無業的時候我應該會多來啊~

好像多倫多喔~

看午後太陽，灑一片金黃，誰也沒法擋咖啡的清香~

左：英式紅茶；右：煙三文魚三文治

左：三文魚磨菇長通粉配辣蕃茄汁；右：巧克力蛋糕 (這裡每天只提供一款pastry)

二樓有一個cheese room及酒庫，藏量相當豐富；盞吊燈也很盞鬼~

左：架上放滿各類貴價茶葉及果占；右：門外告示牌預告即將舉行的活動~
門前可偷雞泊車，當日就分別見到，左：古董平治；右：火紅法拉利~

情人節‧燒‧炭！

尋晚情人節，因為無人無物，
周圍又見到啲人一雙一對，我一時感懷身世，
所以.. 走咗去.. 燒‧炭！
不過.. 唔止我一個燒架，我哋total有8個人，
燒咗成3粒鐘，不知幾鬼高興~

呢間燒鳥店隱藏喺銅鑼灣駱克道，
富臨飯店側邊條後巷既一棟商業大廈！
呢棟大廈其實全部都係色情架部嚟架，
係零零舍舍得呢間食肆喺度，超怪。
尋晚我上去既時候就同2位妙齡菲籍女子同lift..

呢間“炭”係RY既舉腳推介，
成間舖有二千呎到啦，裝修以深木色為主，
燈光又暗暗咁，好有日本居酒屋feel。
一入門口對正有個U型既bar檯，
另外就仲有啲4人同2人檯，set得好闊落架，絕對唔會迫迫gip。
話晒尋晚係情人節，所以都有好幾pair情侶，
最大檯係我哋架啦，另外就仲有啲日本中年單身人士咁囉。
提提你，呢度係無餐牌架，食物既種類就咁寫晒喺牆上面架咋。

講咗咁多不如一齊睇吓尋晚啲相先啦..

樓下個水牌，如果家母嚟到肯定啋啋聲~ 店內情景~ 想知有咩食就要望實度牆啦~ 前菜：三文魚包住薯仔；嘩，個前菜已經好好味~ 炸豪；超級juicy 來來來，喝完了這杯再說吧~ 左：雞肉串(混入了少許軟骨)；右：煙肉蕃茄卷 左：燒雞軟骨/雞皮；右：炒雜菜燒羊架；肉汁超多/鮮嫩無比 左：燒冬菇；右：燒甜粟米(塗上garlic butter) 左：燒牛脷；右：燒厚切鰻魚 (大大塊食得好暢快) 左：燒雞腎；右：燒鵝肝 (呢個必食，入口即溶架)另一滋味推介：燒立魚 (肉質鮮美，外面脆卜卜入面軟綿綿) 左：燒飯團；右：燒雞翼 左：燒雞掌肉 (雞掌既肉，口感好爽)；右：燒牛肋骨 呢個犀利呀，鵝肝蛋飯.. yum yum.. 我成碗食晒，罪過罪過~ 老細一定好鍾意小吉，收銀處有個吉住冬菇既小吉之外，門上面又有呀~

大家睇到啦，我哋係食咗好多野架，有啲仲有encore添，加埋3支大3支細既sake啦喎.. 埋單每人係要5舊水架！雖然有啲肉赤，不過我從來都覺得物有所值係最緊要既，又唔係成日食，耐唔時對自己好啲，個人會靚啲同開心啲架~~

陳慧嫻‧香港Cindy Lauper？！

陳慧嫻，對我來說真是由細聽到佢大呀！記得小六的那個聖誕假期，我跟一些學長參加了一個在當時相當哄動學界的聯校才藝比賽“Magma”，敝校聯同MSS對抗九龍的LS及St.Mary。比賽當中包括模仿歌星、話劇及歌唱等環節。而在歌唱環節中就由我的一位學長彈鋼琴，慧嫻負責演繹。要知道當年的慧嫻已是學界響噹噹人物，多次代表MSS參加不同比賽並贏得很多殊榮。當晚慧嫻一開腔即引得全場哄動， 技巧簡直跟職業歌手無異，嚇得我這個小六生擘大口得個窿！數年後，慧嫻真的當上了歌手，發過多張叫好叫座的專輯，hit歌一籮籮，當時我幾乎買齊所有專輯.... 直至她到美國升學為止。回來後的慧嫻，我已不太喜歡，原因除了我已成蓮教死硬信眾外，老實說其歌路與形象都太悶蛋了，我寧願要陳立品造型的她囉，嚇人得來起碼有點點可愛喔。

年初二晚因飛來橫“票”，所以有機會看看這個事前被傳差點開不成的《陳慧嫻活出生命Live II演唱會》。秉承張學友活出生命Live 的傳統，這趟慧嫻version亦當然會唱人及唱自己的作品。

Rundown如下 -
‧唱人部份：
1. My Love Will Get U Home
2. 明日有明天
3. 花火 (原唱：梁詠琪) - 可能初段還未開聲，假音部份完全無聲..
4. 喝采 (原唱：陳百強) - 原來Danny是慧嫻第一個男性偶像，而08年新寵是田北辰喎 ，她還用了幾分鐘去解釋原因囉 (....)
5. 最愛是誰 (原唱：林子祥)
6. 愛在深秋 (原唱：譚詠麟) - 原裝已經好悶，慧嫻版也不弱..
7. 左右手 (原唱：張國榮) - 又借題發揮大講戀愛論囉 (....)
‧送給她的3個前度男朋友 (8-10)
8. Close To You (原唱：The Carparnters)
9. 相識非偶然 (原唱：譚詠麟)
10. 默契 (原唱：鄭秀文)
11. 月半小夜曲 (原唱：李克勤) - 高音幾flat
12. 等了又等 (原唱：陳潔儀) - 唱人部份以這首表現最佳..
13. 原來只要為你活一天 (原唱：張學友)
14. 一對寂寞的心 (鄭中基合唱)
15. 星光伴我心 (鄭中基獨唱)
‧唱自己部份：
16. 傻女 - 3大弊病：高音部份非常走鋼線/追拍子情況相當嚴重/抖氣位超怪
17. 花店
18. Joe le Taxi - my fav，好開心.. “租架的士做生意~~”..
19. 今天的愛人是誰
‧Unplugged (20 - 22)
20. 玻璃窗的愛
21. 人生何處不相逢
22. 癡情意外
23. 情意結 - 原來是上一張專的輯第3主打，好聽喎..
24. 飄雪
25. 夜機 - 唱自己部份表現最佳的一首，感情滿瀉..
26. 無名指 (新歌) - 派了台？？
27. Love Me Once Again
28. 幾時再見
‧Encore
29. 逝去的諾言
30. 千千厥歌

看完整個演唱會後有幾點意見想給予慧嫻：
1. 不要再提歐丁玉及那些XYZ男朋友好無..
2. 不要不停口說自己好恨拍拖家搞到成個怨婦咁好無..
3. 不要癲癲喪喪講野亂七八糟好無..
4. 不要以為自己傻吓傻吓就覺得似Cindy Lauper好無..
5. 不要跳舞跳到騎騎呢好無..
6. 不要再為自己唱歌唔夠氣而諸多辯駁好無..
7. 不要再拿你的米飯班主(主辦商)個名來搞爛gag好無..

如果下次演唱會可以抹晒以上7點，我會買飛睇呀，努力啦慧嫻！

開場前5分鐘的情景，相當多吉位，當晚應該只得6成滿~
舞台及燈光都非常“清”..
這條白裙相當飄逸，應該都match Bjork喎~

鼠年赤口飯局

有幾年無搞過開年飯局啦，今年因為好多朋友都留喺香港過年，所以順應民意又搞一次。初初諗住十零人算數，點知搞搞吓搞出成廿三人出嚟，好鼎盛。而經過諮詢同覆核之後，年初三係最齊人既，咁就年初三囉，話之嗰日係赤口啦。部份賓客準時五點蒲頭開檯發新年財，三檯麻雀，兩檯台灣一檯廣東，嘈喧巴閉，好高興~ 我最後都贏咗一舊水，開心晒！

呢檯背住鏡頭嗰位一贏三囉~

呢檯帶冷帽嗰位就一輸三喎~

由廿二張檯組成既一張超長檯，好grand呀~

等緊開餐，大家傾吓偈先~

咁赤口飯局有咩食呢？大家睇睇.. (其實仲有乳豬全體、拼盤同合桃露架，不過唔記得影低)

左：木瓜鮮魚湯；右：炸海鮮卷

左：西蘭花帶子吊片；右：斑片兩味左：發財好市；右：炸子雞

左：糯米飯；右：干燒伊麵

左：壽桃；右：大大個勁好味，好多蓮蓉同好大個蛋黃囉~

大家食得幾開心！恭喜發財~

DC直豎姆指，唔知係咪話啲野好食呢？

過年咁高興梗要開香檳啦~

食完飯，部份朋友就返咗屋企，我哋呢啲咁爛玩既就梗係過場繼續飲飲飲同唱唱唱啦..

DC/ST/Fun/KC/AL

喂，玩夠啦，大家好返屋企啦~

喺擾攘期間TL被發現想偷走，佢登時俾劉姑用膠袋笠頭，差啲窒息呀陰功~

過年糖果之回憶

九歲以前不太喜歡農曆新年，原因是在下有嚴重哮喘，喉嚨異常敏感，很容易因為咳嗽而引至哮喘發作，所以對一切太甜太冷或煎炸熱氣的食物都要敬而遠之。農曆年喎，全部都是勁甜或超油膩食物啊，有得睇無得食，好慘。記得當時只有兩種比較mild些的糖果可以“入口”：瑞士糖/椰子糖。當別的小朋友可以大粒大粒朱古力或大大塊年糕放入口之時，我就只能獨沽兩味。幸好九歲之後的情況有了180度轉變，因為那年暑假，家母聽從家庭醫生的吩咐帶了我去學游泳，自此哮喘就好像不藥而癒。沒有了哮喘，家母開心到不得了，在過農曆年的時候也就讓我任意的吃個夠，親戚朋友帶來的朱古力、餅乾等食品全都幾乎給我掃清光。那麼我小時候又最喜歡在農曆新年期間收到甚麼糖果呢？等我數一數啦..

1. 樂加杏仁糖
- 今時今日依然是過年送禮熱門糖果之一，一粒粒佈滿碎花生的焦糖朱古力被金色錫紙包著，活像一條條黃金般，夠晒金碧輝煌，加上classy的粉紅色圓罐，正！聽到很多朋友都說樂加杏仁糖太甜，umm.. 可能在下天生一副甜牙齒，唔覺甜囉，我試過最高記錄一次過吃了近30粒啊。

2. 丹麥藍罐曲奇
- 充滿牛油香又脆卜卜，是那個年頭的高貴曲奇餅，平時很少機會吃，通常都是期待過年的時候親戚會帶來一罐(最好是大size)。罐內有5款曲奇，而每次我都會跟自己的喜好逐款幹掉：圓型乜都無 --> 8字型有糖面 --> 長方型有糖面 --> 中間有個窿 --> 有提子乾，食完一層又有一層，好開心呀。

3. 積及朱古力橙餅
- 是當時同學仔間的best buy，個個一見到都會雙眼放光。一條條帶有橙香的朱古力威化，用著閃靚靚金色包裝紙包著，像一磚磚小型金條，送禮夠意頭。我就最喜歡先把朱古力橙餅放入雪櫃雪它一雪，原因有二，一：朱古力很易溶，有時放在室溫的地方也會溶掉，二：冷藏後餅身會硬一點，口感亦會相應好一點。

4. 花街朱古力
- 有人可以告訴我現在還有花街朱古力的嗎？很懷念那個長型鐵盒，盒上面畫了很多公仔，每個公仔都是西方古代紳士淑女的裝扮，擺明是走高檔路線。盒內則載著不同包裝不同形狀的朱古力及拖肥糖，琳瑯滿目，看得人心花怒放。我記得最喜歡的一款是用著紫色光紙包著的朱古力。還有一點要說的是當年家裡的傭人很喜歡將花街朱古力的吉盒變作盛載針線的工具箱，每年都會更新一個，很搞笑。

5. 麥提沙朱古力
- 不曉得甚麼時候才有禮盒裝的出現，記得小型禮盒裝一盒有4包，大人們通常都會分一包與一至兩個小朋友共同分享。麥提沙是泊來品，比較高檔，價錢在當年來說也不算便宜，因此有本地廠商混水摸魚，製造出差幾皮的麥麗素朱古力。我們這些嘴饞的小朋友如果收到麥麗素朱古力是會黑面的啊。