12.11.2008

共勉之

勢估不到前日轉載葉志偉的文章會惹來如此澎湃的回應,如果是初來步到的讀者可能以為去了toliet wall!大家不要誤會,這裡只是一個張揚在下生活寫東寫西寫無無謂謂的網址,噢畸潔淨的,並不需要PG家長指引,大家放心好了~

入正題..

可能聖誕將至,天氣又開始轉涼,需要一個壯闊胸膛的慾念特別強烈,但時日經已無多,臨急抱彿腳,何來有飛來橫胸呢?就算給我呢三幾日撞啱一個,也需要時間吃飯、行街、睇戲、msn、講電話、了解一下架~ 現在只餘下個多星期,實在不夠!
其實在決定跟某人正式發展之前,你認為需要多久的時間去了解他/她才會讓這段感情開步呢?

最近我聽到了一個故事..

早前在一個國際小姐的活動上遇到當年楓葉國的一位女性友人,以下簡稱為BB。BB個子生得不算高,但樣子清麗可人、能言善辯、心思細密如塵,絕對是一個好女友的材料。後來BB跟友人分手了,從此我們就失去聯絡。這次重遇我們除了懷舊一番喪笑一餐外,還談到近況..

Fun:咁你而家點呀,有無拍拖?
BB:無呀~ 你呢?
Fun:我都無呀~
BB:遇唔啱?
Fun:係囉.. 都唔知去邊度識人.. 咁你呢,而家做PR,會唔會易啲識人?
BB:又係咁.. 而家識人.. (吞吐) 真係好驚~
Fun:驚?
BB:係呀.. 早3個月,一個我識咗10幾年既朋友介紹咗個男仔俾我,外型幾ok架,有正當職業,又係響外國返嚟.. 初初就互相send吓email,跟住就msn,之後仲約過出嚟食lunch,各方面都幾ok架~ 咁樣既關係大概維持咗個幾月到,我覺得可以發展吓囉..
Fun:咁跟住點..
BB:有一次佢約我去佢屋企,話煮一餐飯我食..
Fun:嘩...
BB:佢煮嘢好好食添~
Fun:咁咪加晒分?
BB:聽埋先啦.. 我仲買咗支酒上去添,成個過程都好愉快.. 點知..
Fun:(緊張) 咩事?
BB:食完飯傾咗一輪之後我嗌走.. 我一嗌走,佢即刻開始黑面同質問我點解要走..
Fun:..............
BB:我堅持話要走,咁佢越講越嬲,跟住大聲話:你有無搞錯呀,你都唔跟我個plan既?
Fun:有plan先好喎~
BB:我好驚,開始喊,想衝出門口,點知佢好大力扯返我入屋,推咗我落梳化~
Fun:oh my god...
BB:真係好驚,我越喊佢越惡... 所以忍住,淨係不停咁話:俾我走啦..
Fun:嘩.. 咁.. 點呀..
BB:好彩過咗10分鐘之後佢俾我走咋!
Fun:真係嚇都嚇死..
BB:係囉.. 已經溝通咗成個幾月啦,點知原來佢係咁既~ 唉.. 真係無嘢講~ 我諗我有排都唔會date人架啦~

上述故事純屬堅料,本人全無老作加鹽加醋!後來我跟其他友人分享了這個故事,他們有以下言論..
A:你個frd好純情架,叫得佢上去屋企,孤男寡女,諗住齋食飯?
B:直同孿唔同吓嘛,孿既就一味諗住嚟料啫..
C:直既你估唔會諗住上床咩,咪一鬼樣~
D:會唔會你個friend個樣太易上呢?
E:喂,唔係直同孿既關係喎,係肯唔肯既問題啦,邊有得夾硬架~
A:最大既問題係條仔係你老友介紹你識嘛,幾咁hurt..
B:總之咩人都有啦,熟人介紹又係咁,自己識既又唔知咩底細~
C:咁你個friend而家無事算執返身彩啦~

各位單身網友,共勉之,祝早日找到合適的壯闊胸膛!

9 comments:

CH Mak said...

世风日下。
gum狼胎???

best actor said...

“Date” o左5個月都睇唔出呢個人o甘性急﹐可能知人口面。覺得一個人﹐認識一點點自衛術防身﹐無可厚非。

Agnes Tse 艾麗絲謝 said...

好驚, 好驚, 幾乎辣手摧花.

返屋企都俾人兇, 唉.

Wordy said...

A 的第一個回應好像有點武斷,但……其實唔理個女仔生成點,個男既係咪自己個 fd 介紹都好,決定(第一次)上人屋企,仲要得對方一個,自己都要做好(想做同唔想做既)準備囉

答番你個問題,時間長短冇一定,我睇雙方性格喇。大家都被動,冇人肯郁或俾 signal,可能未開始已結束 ~

karvitz said...

我鍾意你寫出來的「正檔」職業,有個檔口又真係幾唔錯喎!哈哈

唔係專登捉你錯字的,祝聖誕後新年前搵到個壯闊胸膛喇。

Fun said...

to MM
真人真事啊~

to vince,
真係知人口面囉..

to agnes,
女仔係洩底d既~

to wordy,
咁有時未上去之前係想做, 但係上到去又突然唔想做既..
都係.. 凡事無一定, 有d一撻即著, 仲不知last得幾耐~

to karvitz,
噢.. 又錯別字~

真面目な水晶 said...

唉~D好男人/好女人都唔知去晒邊?...唔好話要求高呀, 淨係想搵個可以溝通到, 傾到計既都好似好難咁>.<

Agnes Tse 艾麗絲謝 said...

咁又未必. 我有位男性朋友拍左四年拖, 女友粒聲唔出就飛左佢, 話要自由喎...但個女仔本身好濫交, 仲唔知自己俾人趙完唱.

四年就當係交學費, 睇左場禽獸真面目囉.

edward wong said...

其實男0既當自己係襄王當女係有心0既神女都唔算錯,最錯係唔好反轉豬肚。行走江湖,天大地大,何必勉強搞到0甘爛呢?傳開去個朵就唔靚架啦。