金草莓推介 - 森冤

爛片有兩類，第一類：由故事到導演、演員、甚至係個戲名，總之成個格局都擺明係爛嘅，呢類例子有 - 我愛醫家人！(主演 - 譚詠麟/李克勤) 第二類：表面睇完全係無事，導演ok、卡士唔削、故事有啲睇頭，呢類例子最近有 - 森冤！(主演 - 鄭伊健/舒淇/李彩華) 第一類爛片，首先我一定唔會買飛入場，就算有coupon唔駛錢都唔會諗。叫我睇譚詠麟同李克勤做戲，真係唔好去死！ 第二類爛片，就比較tricky，真係耐唔時就會有一套咁既戲可以呃鬼我入場。 上星期六就因為有coupon所以就去咗睇『森冤』，心諗話晒都係彭氏兄弟既作品，衰極應該有個譜，點知...

故事講述城中有座神秘森林，周不時都有年青男女走入去自殺，但係好奇怪，警方往往都揾唔返啲屍體，亦因為咁而引起警方、科學家同傳媒三方面追查。 鄭伊健係植物學家，企圖用科學實驗證明植物係有情感性同記憶。舒淇係女探長，奉命喺上司退休前要查出喺呢個森林發生既一宗姦殺案。李彩華除咗係電視迷信節目主持之外，仲係鄭伊健既女友。

套戲前段都算ok，點知越講越牽強。例如：舒淇身為探長，一條『靚』都無，永遠都係一個人查案。用尖端科技引發大樹重組姦殺案情，其實即係鬼上身，同包公審烏盆係無分別，咁都可以將個疑犯入罪，會唔會兒戲咗啲呢？好啦，跟住到呀李彩華小姐喺森林失蹤，成隊攝製隊可以唔理走人然後得返鄭伊健一個人入去揾？ 跟住劇情越玩越大，我心諗導演會點收科呢？最後就係得到由成個故仔既關鍵人物劉兆銘，亦即係森林既看更一五一十將謎底解開。原來神秘幽靈其實係外星人，外星人攞走自殺屍體既目的係做解剖，想知道點解人類會為情自殺。彭氏兄弟最後竟然要搬出呢一招『外星人』嚟解釋前面既舖排，真係一字記之曰：唉..

我真係好想知彭氏兄弟拍完呢齣戲之後自己有無由頭睇一次先呢？佢哋真係覺得ok？覺得啲觀眾會話好睇？咪玩啦..

唔該唔好成日話無人肯睇港產片啦，唔知衰仲喺度話人，作為觀眾既我咁樣俾人屈，會好激氣架！